Vüqar Bayramov: "Əsas məqsəd ixracatda qeyri-neft sektorunun payının artırılmasına nail olmaqdan ibarətdir"
Tanınmış beynəlxalq reytinq agentliyi "Fitch Ratings" Azərbaycanın uzunmüddətli xarici valyutada defolt reytinqini müsbət proqnozla "BB+" səviyyəsində təsdiqləyib.
Agentliyin son hesabatında belə deyilir. Agentliyin reytinqi saxlamaq qərarı Azərbaycan iqtisadiyyatının bir neçə əsas güclü tərəflərini göstərir. "Fitch" analoji ölkələrlə müqayisədə çox yüksək fiskal çeviklik və dövlət borcunun ən aşağı səviyyəsi ilə xarakterizə olunan Azərbaycanın sabit xarici balansını qeyd edir. Ölkənin əhəmiyyətli suveren sərvət fondu onun maliyyə gücünü daha da artırır. Bununla belə, "Fitch", həmçinin, Azərbaycanın karbohidrogen sektorundan ağır asılılığının davam etməsi, idarəetmənin zəif tərəfləri və nəzərə alınmalı olan digər amillər də daxil olmaqla müəyyən zəifliklərə işarə edir.
Bir sözlə, "Fitch" Azərbaycan iqtisadiyyatının zəif və güclü yerlərini göstərdi. Ümumən, bütün bunları ekspertlər necə dəyərləndirir?
"Artıq yeni dövr başlayıb və yeni dövrün də yeni hədəfləri var"
Məsələ ilə bağlı "Bakı-Xəbər"ə açıqlama verən millət vəkili Vüqar Bayramov buna bir neçə aspektdən yanaşdı: "Bütövlükdə, "Fitch"in Azərbaycan iqtisadiyyatı ilə bağlı qiymətləndirməsi pozitivdir. Çünki bir tərəfdən "Fitch" bir sıra fərqli sektorlarda dayanıqlığın gücləndiyini qeyd edir. O cümlədən, bank sektorunda. Digər tərəfdən, sözsüz, bütövlükdə Azərbaycan iqtisadiyyatı üçün indiki halda ən vacib prioritetlərdən biri də məhz enerji resurslarından asılılığın minimuma endirilməsidir. Əslində mövcud strategiya da bu istiqamətdə fəaliyyətlərin həyata keçirilməsini daha da sistemləşdirir. Bu konteksdən həm "Fitch", həm də digər beynəlxalq təşkilatların bir sıra qiymətləndirmələrində xüsusən diversifikasiya məsələləri qeyd olunur. Bu istiqamətdə atılan addımlar və görülən işlərin genişləndirilməsi tövsiyə olunur. Ancaq bir faktı da qeyd etmək lazımdır ki, son illər həyata keçirilən islahatlar bütövlükdə enerji resurslarının Azərbaycan iqtisadiyyatındakı payının mərhələli şəkildə azalmasına gətirib çıxarıb. Əgər 2015-ci ildə Azərbaycanın dövlət büdcəsinin cəmi 20 faizi qeyri-neft sektorunun payına düşürdüsə, bu rəqəm artıq 50 faizə qədər yüksəlib. Eyni zamanda ümumi daxili məhsulda qeyri-neft sektorunun payı 70 faizə yaxınlaşıb. Təbii, bütün bunlar ondan xəbər verir ki, qeyri-neft sektorunun makroiqtisadi göstəricilərdə payının artması müşahidə olunur. Bütün bunlarda əsas məqsəd Azərbaycan ixracatında qeyri-neft sektorunun payının artırılmasına nail olmaqdan ibarətdir. Hesab edirəm ki, yeni dövrün əsas hədəflərindən biri də ixracatda qeyri-neft sektorunun payının artırılmasıdır. Həmçinin ixrac gəlirlərimizdə artım tendensiyasını saxlamaqla qeyri-neft sektorunun xüsusi çəkisində artımlara nail olmaqdan ibarət olacaq. Ona görə də artıq yeni dövr başlayıb. Yeni dövrün də yeni hədəfləri var. Təbii, bu hədəflər imkan verəcək ki, Azərbaycan iqtisadiyyatının diversifikasiyası növbəti illərdə daha da güclənsin".
Vidadi ORDAHALLI
