Əkrəm Həsənov: "Dollar tələbinin stabil artımı zamanı devalvasiya risqi ola bilər"
13 fevral tarixində keçirilən hərracda rekord məbləğdə dollar satılıb. Bankların həmin gün üçün sifarişi 151.1 milyon dollar olub. Məlumat üçün bildirək ki, bu ayın ilk 13 günündə keçirilən hərraclarda 370.9 milyon dollar satılıb.
Ekspertlər hesab edir ki, rekord məbləğ satışı valyuta bazarında dollara tələbin artdığını bir daha təsdiq edir.
Maraqlıdır, dollara tələbatın artması nə ilə bağlıdır? Manatla bağlı hər hansı bir təhlükə varmı?
"Xarici valyutaya tələbat daha çox bayramqabağı olur, ancaq indi bayram ərəfəsi deyil, bu səbəbdən də banklarla bağlı araşdırma aparılmalıdır"
Bank sahəsi üzrə ekspert Əkrəm Həsənov "Bakı-Xəbər"ə açıqlamasında qeyd etdi ki, bəzi aylar xarici valyutaya tələbat artır və ya düşür: "Xarici valyutaya tələbat daha çox bayramqabağı olur. Ancaq indi bayram ərəfəsi deyil. Bu səbəbdən də banklarla bağlı araşdırma aparılmalıdır. Hansı səbəbdən bank müştərilərinə pul lazım olduğu aydınlaşdırılmalıdır. Onu da deyim ki, ilin əvvəlində sahibkarlara xarici valyuta lazım olur".
Ekspert hesab edir ki, dollar tələbinin stabil artımı zamanı devalvasiya risqi ola bilər: "Devalvasiya o zaman baş verə bilər ki, bankların Mərkəzi Bankdan tələb etdikləri dolların məbləği artan tendensiya ilə davam etsin. Bu tendensiya isə dəyişkən formada davam edir. Hər bir halda Azərbaycanın valyuta ehtiyatları kifayət qədərdir. Hazırda devalvasiya təhlükəsi yoxdur. Məsələn, növbəti hərracda bankların tələb etdikləri dolların həcmi indikindən çox daha az məbləğdə ola bilər. Ən azı 3-4 ay dollar tələbində yüksəlmə olsun ki, bu hansısa devalvasiya və dollar qıtlığından xəbər versin.
Onu da deyim ki, makroiqtisadi göstəricilər və sabit əmtəə qiymətləri manatın mövqeyini dəstəkləyir, ciddi valyuta tənzimlənməsi və Mərkəzi Bankın daxili valyuta siyasəti milli pulun məzənnəsinin sabitləşməsinə çalışır. Bundan əlavə, ölkədə əhaliyə dollar satışına qeyri-qanuni məhdudiyyətlər qoyulub və kapitalın transsərhəd hərəkətinə ciddi nəzarət edilir".
Günel CƏLİLOVA
