Əkrəm Həsənov: "Bankın zərərə uğraması hələ ki, adi vətəndaşlar üçün təhlükə yaratmır"
Zaman-zaman ölkəmizdə fəaliyyət göstərən bir sıra bankların bağlanması əhali arasında narahatlıq doğurur. Məlumdur ki, ötən il bir neçə bankın lisenziyası ləğv olunub. Hazırda isə bu sonluq Bank BTB üçün də qaçılmaz ola bilər.
Açıqlanan statistik rəqəmlərə əsasən, 2023-cü ildə "Bank BTB" ASC-nin xalis zərəri 2 milyon 779 min manat olub.
Onu da bildirək ki, "Bank BTB" yeganə bankdır ki, son 4 ilin 3-nü zərərlə başa vurub. Bundan başqa, 2023-cü ildə "Bank BTB"də müştərilərin tələbli depozitlərinin həcmi 6 milyon 491 manat və ya 2022-ci illə müqayisədə 39% azalıb.
Maraqlıdır, bu il "Bank BTB"-ni bağlanma təhlükəsi gözləyirmi?
"Bank BTB"-nin zərəri həqiqətən zərərdirmi, yəni pul artıq itib-batıb, qayıtmayacaq, yoxsa zərər ondan ibarətdir ki, ehtiyatları çoxdur, ona görə zərər edir?"
Bank sahəsi üzrə ekspert Əkrəm Həsənov "Bakı-Xəbər"ə açıqlamasında bildirdi ki, "Bank BTB"-nin ətrafında zaman-zaman müxtəlif fikirlər səslənir: "Bu bankın Ramiz Mehdiyevin ailəsinə bağlı və zərərlə işləyən bank olduğu deyilir. Ancaq zərərlə işləmək o demək deyil ki, bank bağlanmalıdır. Çünki zərərlə işləyə bilər, amma eyni zamanda Mərkəzi Bankın bütün potensial, kapital, maliyyə tələblərinə riayət etmiş ola bilər. Həm də bankların zərərinin bir qədər özünəməxsus xüsusiyyətləri var. Yəni bankın zərəri həm də ondan irəli gələ bilər ki, problemli kreditləri var və ehtiyat yaradır. Mövcud qanunvericiliyə görə, bankın problemli kreditlərinin ödənilməyən hissəsi müəyyən həddə gəlib çatırsa, bank 100 faiz ehtiyat yaradır. Yəni bu qədər pulu ayrıca fonda qoyur ki, mənim bu qədər problemli kreditim var. Bu məbləğ zərər sayılır. Sabah o pul banka qayıdırsa, zərərdən çıxarılır. Biz indi bilmirik ki, "Bank BTB"-nin zərəri həqiqətən zərərdirmi, yəni pul artıq itib-batıb, qayıtmayacaq, yoxsa zərər ondan ibarətdir ki, ehtiyatları çoxdur, ona görə zərər edir? Burada bir vacib məqam da odur ki, hətta bankın maliyyə göstəriciləri bəzən çox pis olduqda belə, son anda bankın sahibi, yəni səhmdarları oraya əlavə vəsait qoya bilər. Bu yolla bankı xilas edə bilərlər. Onu da nəzərə almaq lazımdır ki, "Bank BTB"-nin səhmdarları kifayət qədər imkanlı adamlardır. İstəsələr, son anda pul verib bankı vəziyyətdən çıxara bilərlər".
Ekspert hesab edir ki, bankın zərərə uğraması hələ ki, adi vətəndaşlar üçün təhlükə yaratmır. Çünki bank bağlansa belə, əmanətləri qorunandır.
Günel CƏLİLOVA
