Xalid Kərimli: "Qoyun ətinin qiymətində baş verən artım mal ətinin də qiymətinə təsirsiz ötüşməyəcək"
Məlum olduğu kimi, son günlər quzu ətinin qiymətində bahalaşma müşahidə edilir. Belə ki, Yeni ildən əvvəl 16-17 manata təklif olunan quzu əti indi 20, bəzi yerlərdə hətta 20-21 manatdan satışa çıxarılır.
Təbii ki, quzu ətinin qiymətinin birdən-birə 20 faiz artması alıcıların ürəyincə olmayıb. İnsanlar sözügedən artımdan sonra tələbatın daha yüksək olduğu mal ətinin də qiymətinin bahalaşacağından narahatdırlar. Satıcılar bildirir ki, rayonlarda quzunun qiyməti bahalaşdığı üçün onlar da məcbur qalıb qiymətləri artırıblar. Artımın əsas səbəbi isə yem məhsullarının qiymətinin bahalaşması ilə izah olunur.
Maraqlıdır, quzu ətinin satış qiymətinin artması nə ilə bağlıdır?
"Orta və uzunmüddətli dövrdə xırda və iribuynuzlu heyvandarlıqla məşğul olan şəxslərin sayı artmasa bahalaşma davam edəcək"
Iqtisadçı ekspert Xalid Kərimli "Bakı-Xəbər"ə açıqlamasında qeyd etdi ki, ətin qiyməti son illər bahalaşmaqda davam edir: "Qiymət artımına təsir edən bir neçə səbəb var. "Birincisi, son dövrlər heyvan yemlərinin qiyməti bahalaşıb. İkincisi, burada tələb və təklif məsələsinə də diqqət yetirmək vacibdir. Yəni ət istehsalı azalır, bir tərəfdən də əhalinin sayı və təbii olaraq tələbatı artır. Üçüncüsü, heyvanların örüş sahələrinin, həmçinin kiçik ailə təsərrüfatlarının sayı getdikcə azalır. Ümumilikdə şəhərləşmə prosesi baş verir və daha çox bağçılıq, əkinçilik inkişaf etdirilir. Bu gün, demək olar ki, heyvanlar üçün örüş sahəsi qalmayıb. Bütün bunlar sonda ətin qiymətinin bahalaşmasına istər-istəməz təsir edir. Ümumiyyətlə, qiymətin bahalaşmasının əsas səbəbi xırdabuynuzlu heyvanların sayının azalması fonunda tələbatın günü-gündən artmasıdır".
İqtisadçı onu da əlavə etdi ki, işğaldan azad edilən ərazilərdə otlaq sahələrinin geniş olması burada heyvandarlığın inkişafı üçün imkanları artırır: "Məlumdur ki, həmin ərazilərdə hələlik heyvandarlıqla məşğul olmaq üçün şərait lazımi səviyyədə deyil".
Ekspert hesab edir ki, orta və uzunmüddətli dövrdə xırda və iribuynuzlu heyvandarlıqla məşğul olan şəxslərin sayı artmasa bahalaşma davam edəcək. Bahalaşmanın dayanması üçün qoyun, keçi yetişdirilməsi çoxalmalıdır. Həmçinin, xaricdən - Gürcüstün, İran, Dağıstandan qoyun ətinin idxalı artmalıdır.
Həmsöhbətimizin fikrincə, qoyun ətinin qiymətində baş verən artım mal ətinin də qiymətinə təsirsiz ötüşməyəcək. Mal ətinin nə zaman və nə qədər bahalaşacağı isə qoyun ətinin yüksək qiymətdə qalmasından asılıdır.
Günel CƏLİLOVA
