Prezident İlham Əliyev yerli televiziya kanallarına müsahibəsində özəl sektora müəyyən tövsiyələr verib. Ölkə başçısı deyib ki, onlar yaranmış vəziyyətdən istifadə etməlidir:
"Çünki vaxt gələcək, dediyim o Qarabağı və Zəngəzuru cənnətə çevirəcəyik, bu, reallığa çevriləcəkdir. Mənim heç bir şübhəm yoxdur, çünki şəhərlərin bütün Baş planları təsdiqləndi. Şəhərlərin bütün Baş planları dünyanın, daha doğrusu, Avropanın ən qabaqcıl şirkətləri tərəfindən hazırlanmışdır, o cümlədən Şuşa şəhəri. Şuşa elə bir şəhərə çevriləcək ki, bunun dünyada bənzəri olmayacaq, memarlıq və təbiət bir vəhdət təşkil edəcək.
Ona görə bizim özəl sektorumuz Bakıda, Sumqayıtda hər bir tində ev tikməkdənsə, getsinlər orada evlər tiksinlər və görərlər ki, o iqtisadi cəhətdən də səmərəli olar və eyni zamanda, biznesin sosial məsuliyyəti nöqteyi-nəzərindən də önəmli olar. Çünki bu gün biznes dairələri üçün Azərbaycanda çox gözəl şərait yaradılır və dövlət tərəfindən dəstək göstərilir. Ona görə biznesin sosial məsuliyyəti, hesab edirəm ki, bu olmalıdır. Getsinlər, müəssisələr qursunlar, evlər tiksinlər, zavodlar, fabriklər inşa etsinlər, dövlət isə öz üzərinə düşən bütün işləri görəcək - infrastruktur, xəstəxanalar, məktəblər, su anbarları, qazlaşdırma, içməli su, elektrik enerjisi, evlər, yollar, körpülər. İndi ancaq Murovdağın altındakı tuneli nəzərə alsaq, bunun uzunluğu təxminən 12 kilometrdir. İndi təsəvvür edin, bir tunel 12 kilometrdir, amma belə tunellərin sayı, - düzdür, o ölçüdə yox, - onlarladır. Yəni, 2024-cü ildə bu işlərə çox güclü təkan veriləcək və bütün qarşıda duran vəzifələr təmin ediləcək".
Maraqlıdır, Prezidentin bu tövsiyyələrinə tikinti sahəsi üzrə ixtisaslaşan şirkətlərin münasibəti necədir?
İsfəndiyar Axundov: "Bunu mən hər zaman arzulamışam"
"Şərur MTK"-nın rəhbəri İsfəndiyar Axundov "Bakı-Xəbər"ə açıqlamasında bildirdi ki, ölkə başçısının müsahibəsini izləyib: "Həmin müsahibədə bir çox sahələrlə bağlı önəmli fikirlər bildirildi. Təbiidir ki, Prezidentin özəl sektorla bağlı etdiyi tövsiyələr diqqətimizi daha da cəlb etdi. Hər bir azərbaycanlı kimi mənim də ən böyük arzum işğal altında olan ərazilərimizin işğaldan azad edilməsi idi. Çox şükür ki, cənab Prezidentimizin apardığı siyasət nəticəsində Azərbaycan öz torpaqlarını işğaldan, əsarətdən azad edilib. Belə bir şərait yaranarsa biz də həmin ərazilərimizdə binalar inşa edərik. Bunu mən hər zaman arzulamışam. Bizim bu sahədə böyük təcrübəmiz var. Prezidentin tövsiyəsinə böyük önəm veririk. Hər zaman dəyərləndirməyə hazırıq".
İradə Nürəddinqızı: "2024-2025 -ci illərdə nəzərdə tutduğumuz layihələr sırasında işğaldan azad olunmuş rayon və şəhərlərimizdə zövqlü memarlıq nümunələri inşa etməyi düşünürük"
"Sipark İnşaat" şirkətinin mətbuat xidmətinin rəhbəri İradə Nürəddinqızı "Bakı-Xəbər"ə açıqlamasında bildirdi ki, cənab Prezidentin özəl sektora etdiyi çağırış onlarln da diqqətini cəlb edib: "Sipark İnşaat" tikinti şirkəti olaraq, biz də Prezidentin tövsiyələrini həyata keçirməyi düşünürük. İlham Əliyevin də dediyi kimi, gələcəkdə cənnətə çevriləcək ərazilərimizdə tikinti sahəsində bizim də izimizin olmasını istəyirik. Buna görə də 2024-2025 -ci illərdə nəzərdə tutduğumuz layihələr sırasında işğaldan azad olunmuş rayon və şəhərlərimizdə zövqlü memarlıq nümunələri inşa etməyi düşünürük".
Məhəmmədəli QƏRİBLİ
