Son zamanlar sosial mediada, əsasən ev almaq istəyənlərin əmlak üçün edilən ödənişin mənbəyini təsdiq edən sənədi alqı-satqı zamanı notariat ofisinə təqdim etməli olması geniş müzakirə olunur.
Yəni yeni qaydalara görə, bu ildən mənzil almaq istəyən şəxslər xərclədiyi vəsaitin mənbəyini göstərməli olacaq. Bu məlumat isə ictimaiyyət arasında narazılığa səbəb olub.
Elnur Fərzəliyev: "Daşınmaz əmlakların notarial alqı-satqısında 20 000 manatdan artıq məbləğ ücün gəlir deklarasiyası tələb olunur"
Daşınmaz əmlak üzrə ekspert Elnur Fərzəliyev "Bakı-Xəbər"ə açıqlamasında qeyd etdi ki, daşınmaz əmlakların notarial alqı-satqısında 20 000 manatdan artıq məbləğ ücün gəlir deklarasiyası tələb olunur: "Əmlak alışı ücün ödənilən pulun rəsmi mənbəyi göstərilməlidir. Alıcılar gəlir deklarasiyası təqdim edə bilmədikləri ücün notarusdan geri qayıtmalı olurlar. Məlumdur ki, ölkə əhalisinin 25 faizə qədəri Rusiyada yaşayır və işləyir. Digər ölkələrdə də 100 minlərlə vətəndaşımız yaşayır ki, orada qazandıqları pulları ölkəmizin daşınmaz əmlak sahəsinə yatırım edirdilər. Başqa bir tərəfdən, ölkədaxili kənd təsərrüfatı və digər sahələrdən qazanc əldə edən şəxslər də yetəri qədərdir ki, onlar da gəlir deklarasiyası təqdim edə bilmirlər. Bir tərəfdən Bakını yenidən tikib qurmaq istəyirik, digər tərəfdən də tikənlərin belini qırırıq. İnsanlarımızın aldığı əmək haqqı ilə sürdükləri avtomobillərlə yaşadıqları evlərin qiymətləri axı hec vaxt üst-üstə düşməyib".
Elnur Əsədov: "Hansı mənbədən gəlirlər əldə olunur, pullar hardan gəlir və sairənin mənbəyi göstərilməlidir, bu, qanunun bir tələbidir"
Əmlak məsələləri üzrə ekspert Elnur Əsədov bildirdi ki, ölkədə artıq uzun müddətdir gəlirlərin göstərilməsi ilə bağlı müəyyən məsələlərə toxunulur: "Hansı mənbədən gəlirlər əldə olunur, pullar hardan gəlir və sairənin mənbəyi göstərilməlidir. Bu, qanunun bir tələbidir. Bu ildən artıq mənzil alarkən gəlir mənbəyinin göstərilməsi ilə bağlı tələbnamə var. Lakin burda maraqlı nüanslar da var. Qanunvericilkdə müəyyən tələblər var ki, onların açıqlanması vacibdir. Məsələn, həmin mənzil hansı dövrdə alınıbsa göstərilməlidir. Təzə alınmış mənzildirsə, yəni son bir-iki ildə alınıbsa, onu təkrar satıb yeni mənzil alırsa, bu halda həmin şəxsin gəlirinin mənbəyini göstərməsi daha məqsədəuyğun olur. Amma mənzili keçmiş zamanda alıb-satıbsa, həmin ev miras payı ola bilər, valideynindən ona qalmış əmlak ola bilər. Yəni bunların müəyyən tarixçəsini göstərməyə ehtiyac var".
Günel CƏLİLOVA
