Kamran Məmmədli: "Son 5 ildə Azərbaycanda minimum əməkhaqqı 2,7 dəfə artırılıb, ümumiyyətlə, sosial təminatın gücləndirilməsi sosial siyasətin əsas səbəblərindəndir"
Son 5 il ərzində həyata keçirilən çoxmiqyaslı və çoxşaxəli sosial islahat proqramları çərçivəsində Azərbaycanda minimum əməkhaqqı 2,7 dəfə artıb. Bunu əmək və əhalinin sosial müdafiəsi naziri Sahil Babayev sahibkarlara "Dayaq" mükafatının təqdim olunması mərasimində deyib.
Nazir bildirib ki, qeyd edilən dövrdə orta əməkhaqqı 80 %-dək, median əməkhaqqı 2,2 dəfə, əməkhaqqı fondu isə 2,7 dəfə artıb.
Nazir qeyd edib ki, Azərbaycan dövlətinin siyasətində məşğulluq ana xətdir. Məşğulluq təmin edilmədən ölkə iqtisadiyyatı inkişaf edə, əhalinin rifahı təmin oluna bilməz: "Dövlətimizin başçısı tərəfindən həyata keçirilən islahatlara, müxtəlif tədbirlərə, qəbul edilən proqramlara nəzər saldıqda bütün tədbirlərin əhalinin rifahına, onun həyat şəraitinin daha da yaxşılaşdırılmasına, o cümlədən məşğulluğun genişləndirilməsinə yönəlib".
"Minimum aylıq əmək haqqının gözlənilən artımı ixtisassız işçilərin, aztəminatlı ailələrin, ictimai və sosial işlərdə çalışanların həyat şəraitini yaxşılaşdırır"
Minimum əmək haqqının 2,7 dəfə artmasının sosial əhəmiyyəti barəsində danışan iqtisadçı Kamran Məmmədli "Bakı-Xəbər"ə açıqlamasında qeyd etdi ki, Azərbaycanda həyata keçirilən sosial siyasətin mərkəzində vətəndaşların sosial rifahının yaxşılaşdırılması, layiqli və keyfiyyətli həyat şəraitinin təmin edilməsi dayanır. Bu siyasətə uyğun olaraq əhalinin sosial müdafiəsini gücləndirmək məqsədilə cənab Prezidentin "Əhalinin sosial rifahının yaxşılaşdırılması sahəsində əlavə tədbirlər haqqında" Sərəncamı davam etdirilən əhatəli sosial tədbirlər planının tərkib hissəsidir. Bu tədbirlərə uyğun olaraq son illər ölkəmizə minimum əmək haqqı artmaqda davam edir: "Minimum əməkhaqqının artması əksər sahələrdə, o cümlədən elm, təhsil, səhiyyə, sosial müdafiə və sosial təminat, mədəniyyət və digər sahələrdə çalışan on minlərlə şəxsin əməkhaqlarının artırılmasına öz təsirini göstərir. Xüsusilə də minimum aylıq əmək haqqının gözlənilən artımı ixtisassız işçilərin, aztəminatlı ailələrin, ictimai və sosial işlərdə çalışanların həyat şəraitini yaxşılaşdırır. Məlum olduğu kimi, Azərbaycanda minimum əməkhaqqı 2019-cu ilin sentyabrında 250 manata, 2022-ci ilin yanvarında isə 300 manata qaldırılmışdı. Həmin zaman artımlar ölkədə muzdla çalışan işçilərin 40 faizdən çoxunun - təxminən 600 min nəfərin əməkhaqqına müsbət təsir etdi. Hazırkı artım da əvvəlki siyasətə uyğun olaraq 600 mindən çox şəxsin əməkhaqqının artımına səbəb olub".
Həmsöhbətimiz onu da əlavə etdi ki, 2023-cü ilin yanvarından minimum əməkhaqqı 345 manata qədər artırıldı. İlk dəfə olaraq minimum əməkhaqqı 200 dollarlıq həddi keçib. Son 5 ildə Azərbaycanda minimum əməkhaqqı 2,7 dəfə artırılıb. Ümumiyyətlə, sosial təminatın gücləndirilməsi sosial siyasətin əsas səbəblərindəndir. Bu səbəbdən 2024-cü ildə də sosial paketin genişlənidirilməsi və sosial proqramlara daha çox vəsaitin ayrılacağını gözlənilir.
Günel CƏLİLOVA
