Xalid Kərimli: "Blogerlər də gəlirlərinin 20 faizə qədərini gəlir vergisi kimi verməlidir, bunun üçün də VÖEN almalı…"
Azərbaycanda da blogerlik sahəsi geniş yayılıb. Təkcə məşhur şəxslər - aktyorlar, müğənnilər, modellər deyil, adi adamlar da öz bloqlarını yaradaraq bu fəaliyyətlə məşğul olurlar. Sosial şəbəkələrdə tanınan bir sıra şəxslər bu platforma vasitəsilə məhsul reklamlarından gəlir əldə edir.
Onu da qeyd edək ki, blogerlər son zamanlar daha çox Trendyol məhsullarını reklam edir. Onlar öz İnstagram və Tiktok səhfələrində Türkiyənin məşhur alış-veriş səhfəsi olan Trendyol-un məhsullarını reklam edir. Beləliklə, blogerlər həmin reklam vasitəsilə müəyyən faiz əldə edir. Ancaq araşdırmalar zamanı məlum olub ki, bu sahədən gəlir əldə edən blogerlər vergi ödəmir. Danılmaz faktdır ki, bu gün istənilən peşə sahibləri gəlirlərinin 20 faizə qədərini gəlir vergisi kimi verir.
"Vergilər Məcəlləsində də göstərilir ki, bu cür şəxslər fiziki şəxslər sayılır və bu da sahibkarlıq fəaliyyəti sayılır"
Iqtisadçı ekspert Xalid Kərimli bildirdi ki, blogerlər Trendyol linklərini öz şəxsi sosial səhfə səhfələrində paylaşanda alqı-satqının həcminə uyğun olaraq müəyyən komissiya alırlar. Burda Trendyol blogerlərin əhatə dairəsindən, informasiyanı yaya bilməsindən istifadə edirlər. Marketinqdə birbaşa satış zamanı müəyyən xərclər olur: "Danılmaz faktdır ki, onlar bu qazancından birmənalı olaraq vergi verməlidir. Vergilər Məcəlləsində də göstərilir ki, bu cür şəxslər fiziki şəxslər sayılır və bu da sahibkarlıq fəaliyyəti sayılır. Onlar da gəlirlərinin 20 faizə qədərini gəlir vergisi kimi verməlidir. Bunun üçün də VÖEN almalı, qeydiyyatdan keçməli, hesabat verməlidirlər. Qeyri-muzdlu işdən olan gəlirdir və Vergilər Məcəlləsinə uyğun olaraq da öhdəliklər müəyyənləşib".
Iqtisadçı onu da əlavə etdi ki, blogerlərin nə qədər qazanması ilə bağlı rəqəmlər demək qeyri-ciddi olar: "Çünki bu adi iqtisadi fəaliyyətdir. Digər iqtisadi fəaliyyətlərdən fərqi yoxdur. Ümumiyyətlə, blogerlər hazırda Trendyolun satış nümayəndələri kimi çıxış edir. Bu da geniş yayılmış praktikadır. Qeyri-adi heç nə yoxdur".
Günel CƏLİLOVA
