Azərbaycanda Trendyol reklamlarından ən çox gəlir əldə edən azərbaycanlı blogerlər açıqlanıb. Bu barədə "ARB" kanalında yayımlanan "Günə son" proqramına qonaq olan tanınmış bloger Ramal İsayev danışıb.
Bildirilib ki, ölkədə sözügedən reklamlardan ən çox pul qazanan bloger Arzu Məmmədovadır. O, bu reklamlardan aylıq 65 min gəlir əldə edir. Bloger Elmira Namazova, aparıcı Zaur Baxşəliyev və Günay Baxşəliyeva aylıq 50 min, İsa Şükürov isə 10 min qazanır. Produser Tarix Əliyev də bu reklamlardan yüksək gəlir əldə edənlər sırasındadır.
Maraqlıdır, məşhur onlayn alış-veriş saytı vasitəsilə azərbaycanlı blogerlər necə qazanc əldə edə bilir?
Fərid Pərdəşunas: "Blogerlərin paylaşdığı kodlardan istifadə edəndə aldığınız məhsulun tam dəyəri həmin bloqerə ödənilir"
Texnobloger Fərid Pərdəşünas bildirdi ki, ötən ay bir neçə bloqer Trendyol linklərindən hər biri ayrılıqda 30,000 dollardan çox pul qazanıb: "Blogerlərin paylaşdığı kodlardan istifadə edəndə aldığınız məhsulun tam dəyəri həmin bloqerə ödənilir. İnanılması çətin olsa da, belədir. Ona görə də "Influencer"lərin aqressiv şəkildə link paylaşdığını görürük".
Kamran Məmmədli: "Blogerlər linkləri paylaşanda alqı-satqının həcminə uyğun olaraq müəyyən komissiya alır"
İqtisadçı Kamran Məmmədli qeyd etdi ki, bu gün Azərbaycan istehlakçıları onlayn alış-verişə, xüsusilə Trendyol vasitəsilə shopinq etməyə üstünlük verir. Bunun da səbəbi qiymətlərin Azərbaycanla müqayisədə qat-qat ucuz olmasıdır: Trendyolun qiymət siyasəti Azərbaycan sahibkarlarının iç üzünün açıq göstəricisidir. Trendyolda satılan məhsulların ucuz olmasının səbəbi inflyasiyanın çox olması ilə əlaqədar olaraq məzənnə fərqində Azərbaycan manatının üstün olmasıdır. Ona görə də Türkiyə qiymətinə məhsulu Azərbaycana gətirmək sərfəlidir. Trendyola marağın yüksək olmasının səbəblərindən biri də endirimlərin olmasıdır. Həmin endirimlər də məşhur bloger adları ilə bağlı promokod hazırlanır. Azərbaycanlı istifadəçilər də həmin promokod vasitəsilə 40-30-20 faiz endirim əldə edir. Məlumat üçün deyim ki, ilk dəfə 40, ikinci 30, üçüncü dəfə sifariş verilən zaman 20 faiz endirim əldə olunur. Məsələn, noyabr ayında bütün istifadəçilər 40 faiz endirim əldə etdi. Bu bir marketinq siyasətidir. Bu endirimlər də blogerlərə verilən promokod vasitəsilə mümkün olur. Hansısa bloger bir müddət Tik-tok və ya İnstagram səhfəsində Trendyol-un hansısa məhsullarının linklərini paylaşır. Bu paylaşımları həmin blogerin izləyiciləri görür və o linklərə daxil olur. Beləliklə, Trendyol görür ki, o bloger Trendyolu geniş reklam edir. Belə olan halda, Trendyol həmin blogerə promokod verir. O promokod vasitəsilə istifadəçilər də endirimli məhsul əldə edir. Blogerlər bu linkləri paylaşanda alqı-satqının həcminə uyğun olaraq müəyyən komissiya alırlar. Burada Trendyol blogerlərin əhatə dairəsindən, informasiyanı yaya bilməsindən istifadə edir. Bəli, bu gün bəzi tanınmış blogerlər bu sahədən yaxşı gəlir əldə edir. Ancaq onlar əldə etdiyi gəlirdən dövlətə vergi ödəmir. Blogerlər də digər peşə sahibləri kimi gəlirlərinin 20 faizə qədərini gəlir vergisi kimi verməlidir. Bunun üçün də VÖEN almalı, qeydiyyatdan keçməli, hesabat verməlidirlər".
Günel CƏLİLOVA
