Xalid Kərimli: "Bu addım işçilərinin sayı 3 nəfərdən az olan mikro sahibkarların gəlirini aşağı salacaq"
Vergi Məcəlləsinə edilən son dəyişikliklə yanvarın 1-dən etibarən 3-dən az işçisi olan, eləcə də təkbaşına fəaliyyət göstərən mikrosahibkarlar üçün güzəştli vergi dərəcəsi (5%) ləğv edilərək 20%-ə qaldırılır. Bu qərar sahibkarlar arasında narazılığa səbəb olub.
Ekspertlər hesab edir ki, bu qərar kiçik sahibkarlıqla məşğul olanlara mənfi təsir edəcək.
Xatırladaq ki, sahibkarlıq subyektlərinin bölgüsü Nazirlər Kabinetinin 2018-ci il 21 dekabr tarixli Qərarı ilə təsdiq edilmiş "Mikro, kiçik, orta və iri sahibkarlıq subyektlərinin bölgüsü Meyarları" ilə tənzimlənir. Qərara əsasən, işçilərinin orta sayı 1-10 nəfər olan və illik gəliri 200000 manatdan az olan şəxslər mikro sahibkarlıq subyekti kimi tanınır.
Maraqlıdır, kiçik sahibkarlığa vergi güzəşti niyə ləğv edildi?
"5 faizlik vergi vergidən yayınmaya imkan verir, sahibkarlığı inkişaf etdirmir"
Iqtisadçı Xalid Kərimli "Bakı-Xəbər"ə açıqlamasında qeyd etdi ki, Dövlət Vergi Xidməti hesab edir ki, 5 faizlik vergi vergidən yayınmaya imkan verir, sahibkarlığı inkişaf etdirmir: "Hesab edirlər ki, dövlət qurumunda əmək müqaviləsi ilə işləyən şəxs 20 faizədək vergi ödəyirsə, işçisi olmayan mikro sahibkar da bu qədər vergi ödəməlidir. Çünki həmin mikro sahibkar əlavə iş yeri yaratmır, işçisi yoxdur. Ona görə də işçisi olmayan mikro sahibkarla hansısa qurumda əmək müqaviləsi ilə işləyən şəxs arasında heç bir fərq yoxdur. 3 işçisi olan mikro sahibkara 75 faizlik vergi güzəşti ona görə edirlər ki, həmin sahibkar cəmiyyətə fayda verir, əlavə iş yeri yaradır".
Ekspert hesab edir ki, bu addım işçilərinin sayı 3 nəfərdən az olan mikro sahibkarların gəlirini aşağı salacaq: "Məsələn, xərclər çıxılmaqla 500 manat qazancı olan həmin mikro sahibkar əvvəl 25 manat vergi ödəyirdisə, növbəti ildən 100 manat ödəyəcək. İstənilən halda bu qərar sahibkarlığın inkişafına səbəb olmayacaq".
Günel CƏLİLOVA
