Əkrəm Həsənov: "Əmək haqqı və təqaüdlərin yalnız bir neçə bank vasitəsilə verilməsi qanunaziddir"
Gələn ildən Azərbaycan vətəndaşları əməkhaqqı və təqaüdlərini istənilən bankdan ala biləcək. Azərbaycan Mərkəzi Bankının sədri Taleh Kazımov bununla bağlı tapşırıq verib.
Buna səbəb isə bank sistemində rəqabətli mühitin genişləndirilməsi, bir neçə sistem qurucu banklardan başqa digər bankların inkişafına yardım üçün şəraitin yaradılmasıdır.
Qeyd edək ki, Azərbaycanda əməkhaqları, təqaüdlər, dövlət şirkətlərinin hesabları bir neçə böyük banklarda cəmləşir. Bu, həmin bankların ölkə ərazisində daha çox filiallarının və bankomatlarının olması ilə bağlı idi. Faktiki olaraq maaş və təqaüdlərin sistem əhəmiyyətli banklar təərəfindən ödənilməsi digər banklar üçün haqsız mühit yaradırdi.
Maraqlıdır, bu addım orta və nisbətən daha kiçik bankların inkişafına səbəb olacaqmı?
"Vətəndaşların əməkhaqqı və təqaüdlərini istənilən bankdan əldə etməsi kiçik və orta bankların inkişaf etməsinə səbəb olacaq"
Bank sahəsi üzrə ekspert Əkrəm Həsənov "Bakı-Xəbər"ə açıqlamasında qeyd etdi ki, əmək haqqı və təqaüdlərin yalnız bir neçə bank vasitəsilə verilməsi qanunaziddir: "Əmək Məcəlləsinə görə. işçi özü hansı bank vasitəsilə maaşı almasını müəyyən edə bilər. İşçinin özü istədiyi bankla müqavilə bağlamalıdır. Təəssüf ki, bu hala riayət edilmir və iş yerləri qanunu kobud şəkildə pozur. Banklar vətəndaşa pensiya, əmək haqqı kartı hazırlayır, hesab açır, ancaq onunla müqavilə bağlamır. Müqaviləsiz xidmət qanuna qarşı çıxmaq deməkdir. Bu qanunsuzluğun nəticəsidir ki, böyük banklar daha inkişaf edib. Qeyd edilən problemin də həll olunması gözlənilir. Bununla bağlı Mərkəzi Banka minnətdar olmalıyıq".
Ekspert hesab edir ki, vətəndaşların əməkhaqqı və təqaüdlərini istənilən bankdan əldə etməsi kiçik və orta bankların inkişaf etməsinə səbəb olacaq. Ancaq bu o demək deyil ki, hər kəs istədiyi banka keçəcək: "Zənnimcə, maaş və təqaüdlərin alınmasında yenə iri banklar üstünlük təşkil edəcək. Çünki iri bankların şəbəkələri, filialları daha genişdir. İstənilən halda bu yenilik həm vətəndaşlara, həm də bank sektoruna müsbət təsir edəcək. Kim istəsə, əməkdaşlıq etdiyi bankı dəyişəcək".
Günel CƏLİLOVA
