Əkrəm Həsənov: "Mərkəzi Bank sədri ilə görüş çox maraqlı və məhsuldar keçdi"
Azərbaycan Mərkəzi Bankının (AMB) sədri Taleh Kazımov növbəti dəfə ölkədəki iqtisadçı-ekspertlərlə görüş keçirib. Görüş zamanı aktual mövzular üzərində fikir mübadiləsi aparılıb və ekspertləri düşündürən suallara münasibət bildirilib.
"Görüş zamanı sədr maliyyə sabitliyi baxımından problemli bankın olmadığını bildirdi. Bundan belə bir nəticəyə gəlinir ki…"
Görüşün necə keçməsi, hansı məsələlərin müzakirə olunması ilə bağlı bank sahəsi üzrə ekspert Əkrəm Həsənovla həmsöhbət olduq.
- Əkrəm müəllim, Azərbaycan Mərkəzi Bankının sədri Taleh Kazımovla keçirilən görüşdə Siz də iştirak edibsiz? Görüş necə keçdi?
- Ümumən görüş çox maraqlı və məhsuldar keçdi. Məlumat üçün bildirim ki, iqtisadçılar artıq üçüncü dəfədir Taleh Kazımovla görüşür, fikir mübadiləsi aparır. Görüş zamanı Mərkəzi Bank sədri bütün sualları yayınmadan cavablandırdı. Təbii ki, Mərkəzi Banka aid olan sualları sərbəst cavablandırdı. Səlahiyyətinə aid olmayan suallardan isə yan keçdi. Bu normal idi. Ümumiyyətlə, görüş çox əhatəli və maraqlı keçdi. Onu da deyim ki, Mərkəzi Bank iqtisadçılar üçün bir sıra məsələlərlə bağlı prezentasiya da keçirdi.
- Gələn il bank sektorunda hansı yeniliklər gözlənilir? Görüş bank sektorunun gələcəyi ilə bağlı sizə hansı təsir bağışladı?
- Görüş zamanı belə bir fikir oldu ki, yaxınlarda Mərkəzi Bankın üç illik strategiyası bəyan ediləcək. Məlumat üçün bildirim ki, hələ ki, belə bir qayda olmamışdı. Nə işlər görüləcəksə onların hamısı strategiyada əks olunacaq. Yanvarda onun təqdimatı olacağı söylənildi, bizim qaldırdığımız bir çox məsələlərin öz həllini tapacağı deyildi. Yanvarda, çox güman, yenə görüşlər olacaq. Bu görüş zamanı həmin prezentasiyalar təqdim olunacaq. Bundan sonra ictimaiyyətə açıqlanacaq.
- Görüş zamanı manatın məzənnəsi, devalvasiya ilə bağlı fikir mübadiləsi aparıldı?
- Mərkəzi Bank sədrinin milli valyutanın durumu, inflyasiya, devalvasiya ilə bağlı kifayət qədər nikbin gözləntiləri var. Eyni zamanda, bank sisteminə dair də eyni gözləntidədir. Taleh Kazımov bildirdi ki, bankların təqdim etdiyi hesabatlara indi daha çox etimad olunur. Açıqlanan hesabatlar kifayət qədər dolğundur.
- Qarşıdakı illərdə hansısa bankın bağlanması gözlənilirmi?
- Görüş zamanı sədr maliyyə sabitliyi baxımından problemli bankın olmadığını bildirdi. Bundan belə bir nəticəyə gəlinir ki, qarşıdakı il ərzində heç bir bank bağlanmayacaq. Bununla bağlı narahatlığa əsas yoxdur. Problemli banklar demək olar ki, qalmayıb. Açıqlamalardan bu nəticəyə gəlmək olar ki, ən azından bugünkü vəziyyətə görə maliyyə sabitliyinə təsir göstərə biləcək hansısa bir bankın bağlanması nəzərdə tutulmur. Onu da deyim ki, Mərkəzi Bankın ləğv prosesində olan banklarla bağlı nəzarəti gücləndirəcəyi gözlənilir. Nəzarətin hansı formada olacağını soruşanda isə bizə bildirildi ki, yaxında bəlli olacaq. Ümumiyyətlə, bu sahədə şəffaflaşma gözlənilir. Xüsusən vurğulandı ki, bank sektorunda təmərküzləşmə var. Bir neçə bank xeyli güclənib. Bu sahədə müəyyən addımlar planlaşdırılır. Sağlam rəqabət mühitinin olması üçün bəzi işlər görüləcək.
- Bəs bank olmayan kredit təşkilatlarının (BOKT) fəaliyyəti ilə bağlı müzakirələr aparıldımı?
- Bank olmayan kredit təşkilatlarının fəaliyyətinin genişləndirilməsi planlaşdırılır. Ödəniş sistemində dəyişiklik gözlənilir.
- Maraqlıdır, sığorta sahəsi üzrə hansı dəyişiklik gözlənilir? Görüş zamanı bu sahə ilə bağlı fikir bildirildimi?
- İcbari sığorta ilə bağlı fikir bildirildi. Daşınmaz əmlakın icbari sığortası ilə bağlı dəyişiklik gözlənilir.
- Ümumiyyətlə, bu görüş sizə necə təsir bağışladı?
- Görüş çox səmimi oldu. Maraqlı fikir mübadiləsi aparıldı. Bu görüşün özü fakt olaraq doğru və maraqlı bir formatdır. Qeyd etdiyim kimi, bu ilk deyil. Bundan öncə də bənzər bir görüşümüz olub. Kifayət qədər açıq, səmimi, detallı müzakirələr aparılıb. Bu faktın özü, Mərkəzi Bankın müstəqil ekspertlərlə görüşlərinin mütəmadi keçirilməsi özlüyündə pozitiv yenilikdir.
Günel CƏLİLOVA
