Ödəmə qabiliyyətini itirmiş bankları saxlamaq nəyə lazımdır? - Üstəlik vergi güzəştləri?
Xalid Kərimli: "Lisenziyası ləğv edilən bankın ləğv edilmə prosesi illər çəkir"
Məlum olduğu kimi, ödəmə qabiliyyətini itirmiş bankların əmlaklarına dair vergi güzəştinin müddəti 2 il artırılır. Bu, Vergi Məcəlləsinə təklif edilən dəyişiklikdə əksini tapıb.
Qüvvədə olan qanuna görə, müvafiq icra hakimiyyəti orqanının müəyyən etdiyi orqan (qurum) ödəmə qabiliyyətini itirmiş bankların rezalyusiyası və sağlamlaşdırma tədbirləri çərçivəsində müvafiq icra hakimiyyəti orqanının müəyyən etdiyi orqanının (qurumun) qərarına əsasən aldığı problemli aktivlərin (borcların) əvəzində əldə etdiyi, onun mülkiyyətində (balansında) olan və siyahısını müvafiq icra hakimiyyəti orqanının müəyyən etdiyi orqan (qurum) ilə razılaşdırdığı əmlaka görə 2019-cu il yanvarın 1-dən 5 il müddətinə əmlak vergisini ödəməkdən azaddır. Bu müddət gələn il yanvarın 1-də bitir.
Maraqlıdır, ödəmə qabiliyyətini itirmiş bankı saxlamaq nəyə lazımdır? Üstəlik, həmin banklara vergi güzəştinin tətbiq olunması düzgündürmü?
"Ödəmə qabiliyyətini itirən bankların borcu yetərincədir, əmlak vergisi də nəzərə alınanda vəziyyət daha da çətinləşir, buna görə də hökumət həmin banklara güzəşt edir"
Iqtisadçı Xalid Kərimli "Bakı-Xəbər"ə açıqlamasında qeyd etdi ki, ödəmə qabiliyyəti itirmiş banklar müflis olan banklar sayılır: "Bugünə kimi ölkədə bir neçə bank müflis olaraq, ləğv olunub. Məlumat üçün deyim ki, lisenziyası ləğv edilən bankın ləğv edilmə prosesi illər çəkir. Məsələn, 10 il bundan öncə bağlanan ATA Bank və ya Texnikabankın lisenziyası ləğv olunsa da, onların prosesi hələ də davam edir. Belə ki, əmlakların realizasiyası illər çəkir. Bu səbəbdən də hökumət ödəmə qabiliyyətini itirmiş banklara güzəşt edir".
Həmsöhbətimiz onu da əlavə etdi ki, ödəmə qabiliyyətini itirən bankların borcu yetərincədir. Əmlak vergisi də nəzərə alınanda vəziyyət daha da çətinləşir. Buna görə də hökumət lisenziyası ləğv olunan banklara güzəşt edir.
Günel CƏLİLOVA
