Azərbaycan Mərkəzi Bankı “Tarix” mövzusuna həsr olunan 10 manatlıq pul nişanının mühafizə sistemləri və dizaynını mövcud konsepsiya çərçivəsində ən son texnologiya və innovasiyalar tətbiq etməklə yeniləyib.
Sözügedən əskinasın üzərində Mərkəzi Bankın sabiq sədrinin imzasının olması maraq doğurub.
Məsələ ilə bağlı qurum açıqlamasında bildirib ki, tədavülə buraxılan yenilənmiş 10 manatlıq pul nişanının istehsalı artıq başa çatdığından, bu pul nişanlarının üzərində Mərkəzi Bankın sabiq sədrinin imzası əks olunub.
Qeyd edək ki, Elman Rüstəmov 1995-2022-ci illərdə Azərbaycan Mərkəzi Bankının İdarə Heyətinin sədri olub. Prezident İlham Əliyevin 13 aprel tarixli Sərəncamı ilə Taleh Kazımov Mərkəzi Bankın sədri təyin edilib.
Mərkəzi Bankdan bildirilib ki, sədr vəzifəsinə yeni təyinatla əlaqədar təyinat tarixindən sonra istehsal olunacaq kağız pul nişanlarında yeni rəhbərin imzası təsvir olunacaq: "Bu zaman həm tədavüldə olan, həm də yeni istehsal olunmuş pul nişanları paralel dövriyyədə olacaq. Eyni zamanda bildiririk ki, cari ilin 22 iyun tarixindən yenilənmiş dizayna və mütərəqqi mühafizə sistemlərinə malik 10 manatlıq pul nişanının tədavülə buraxılması nəzərdə tutulur. Yenilənmiş 10 manatlıq kağız pul nişanlarının istehsalı prosesləri artıq başa çatdığından, bu pul nişanlarının üzərində Mərkəzi Bankın sabiq sədrinin imzası əks olunub. Bununla belə qeyd etməliyik ki, oxşar təcrübə hələ 2009-cu ildə baş vermiş, Referendum yolu ilə “Azərbaycan Respublikasının Konstitusiyası”nda edilmiş dəyişikliklərə əsasən “Azərbaycan Respublikasının Milli Bankı”nın “Azərbaycan Respublikasının Mərkəzi Bankı” kimi adlandırılmasına baxmayaraq, həmin vaxtadək istehsal olunmuş və tədavülə yararlı olan pul nişanları tədavüldən çıxarılmamışdı və bugünədək tədavül vasitəsi kimi paralel olaraq dövriyyədədir".
Doğrudan da, bu proses maraqlı suallar doğurur. Manat əskinaslarının üzərində Mərkəzi Bank rəhbərinin imzası olmalı idimi? Bundan sonra da Elman Rüstəmovun imzası qalacaqmı və ya yeni baş bankirin imzası əskinasların üzərinə qoyulmalıdır?
İqtisadçı ekspert Elçin Qurbanov “Bakı-Xəbər”ə açıqlamasında bildirdi ki, milli pul əskinaslarının üzərində Elman Rüstəmovun imzasının olması tədavül prosesinə heç bir mənfi təsir göstərmir: “Beynəlxalq təcrübədə belə hallar var. Avro əskinasının üzərində Avropa Mərkəzi Bankının yeni prezidentinin imzası var. Həmin postda olanların hər birinin səlahiyyət müddəti 8 ildir. Amma ondan əvvəlki prezidentlərin imzası ilə tədavüldə olan əskinaslar da qanuni ödəniş vasitəsidir. Bu heç nəyi dəyişmir. Yeni pul kütləsi tədavülə buraxılarkən təyin olunmuş yeni rəhbərin imzası əks olunur. Əskinasların dövriyyədən yığışdırılması uzun çəkən prosesdir. Yeni imza ilə tədavülə əskinasların buraxılması isə paralel həyata keçirilir. Bənzər problemlə bağlı Qazaxıstanda mərkəzi bankın rəhbərinin imzasının ümumiyyətlə emissiya olunan pul əskinaslarından tam çıxarılması barədə məsələ qaldırılmışdı.
Bu məsələ mərkəzi bankın rəhbərliyinin qəbul edəcəyi qərarla tənzimlənəcək. Tədavüldən əskinasların yığışdırılması bir neçə il çəkə bilir. Təsəvvür edin, milyardlarla əskinasın dəyişdirilməsi həm vaxt, həm də müəyyən məsrəf tələb edir. Köhnələrin dövriyyədən çıxarılmasını tələsmədən də etmək mümkündür. Əsas odur ki, hər ikisi qanuni ödəniş vasitəsidir. Bu məsələdə əhalinin təşvişə düşməsinə əsas yoxdur. Mərkəzi Bankın işidir”.
Məhəmmədəli QƏRİBLİ
