Bakı Nəqliyyat Agentliyi tərəfindən başa çatmış investisiya layihələri üzrə dövlət büdcəsinin investisiya xərclərindən real tələbatdan artıq maliyyələşdirilmiş 735,1 min manat məbləğində vəsaitin dövlət büdcəsinə qaytarılması təmin edilməyib. Hesablama Palatasının Bakı Nəqliyyat Agentliyinin 01.10.2019-cu il tarixindən 01.01.2021-ci tarixinədək olan dövrdə maliyyə fəaliyyətinə dair dövlət maliyyə nəzarət tədbiri zamanı üzə çıxıb.
Qeyd olunub ki, bu qurum tərəfindən istifadə olunmuş 204,0 mln. manat məbləğində vəsaiti əhatə edib. 2020-ci il üzrə dövlət sifarişinin maliyyələşdirilməsi müqabilində bir sıra gözlənilən nəticələrin ilin sonunadək əldə olunması təmin edilməyib, dövlət sifarişinin dövlət büdcəsinin vəsaitləri hesabına ödənilməsi həcminin müəyyənləşdirilməsi zamanı Agentliyin qeyri-büdcə mənbələrindən daxilolma potensialı səfərbər olunmayıb.
Qeyri-büdcə gəlirlərinin mənbələri kimi 6,4 mln. manat məbləğində cərimələrin göstərilməsi təmin edilməyib, eləcə də müntəzəm marşrutlardakı avtobusların texniki, istismar, təhlükəsizlik və ekoloji tələblərə uyğunluğu yoxlanılmayıb və 0,5 mln. manat rüblük xidmət haqları yığılmayıb. Bu da dövlət büdcəsindən maliyyələşmələrə qənaətləri təmin etməyib. 2020-ci ilin dövlət büdcəsinin investisiya xərclərindən yeni avtobusların alınması üçün Agentliyə köçürülmüş 110 mln. manat məbləğində vəsaitin il ərzində yalnız 67,9%-i istifadə olunub.
“Qurum milyonlar, yüz minlər, dövlət vəsaitinin təyinatsız xərclənməsi, yaxud səlahiyyətlərindən sui-istifadə barədə ictimaiyyətə məlumat verməlidir”
Məsələ ilə bağlı fikir bildirən “Altay” Sosial İqtisadi Araşdırmalar Mərkəzinin rəhbəri Elçin Bayramlı “Bakı-Xəbər”ə bildirdi ki, Hesablama Palatasının BNA ilə bağlı açıqladığı qanunsuzluqlar o deməkdir ki, qeyd olunan qurum öz işinin öhdəsindən gələ bilmir: “Dövlət büdcəsindən maliyyələşən investisiya layihələri tələbatdan artıq olsa belə qurum bu sahədə yaşanan problemləri həll edə bilmirdi. Qurumun büdcəsində vəsait olsa belə onlar heç bir iş görməyiblər. Əlavə layihələr üzrə hər hansı bir iş görməyiblər. Son zamanlar sərnişindaşıma şirkətlərinin guya zərərlə işlədikləri, buna görə də gedişhaqqının qaldırılması məsələsi tamamilə əsassızdır. Bunun heç bir iqtisadi, məntiqi əsaslandırılması yoxdur. Çünki son günlər nə yanacağın qiyməti qalxıb, nə bunların vergiləri artırılıb, nə də digər xərcləri artıb”.
Həmsöhbətimiz onu da əlavə etdi ki, BNA xərcləri şişirtməklə məşğuldur. Onlar artıq lazımsız xərclər təşkil edir. Bu da nəticədə ümumi nəqliyyat sektorunda, sərnişindaşımada maya dəyərini yüksəldir: “Yaxşı olar ki, ayrılmış vəsaitlərdən səmərəli istifadə olunsun. Adıçəkilən qurum milyonlar, yüz minlər, dövlət vəsaitinin təyinatsız xərclənməsi, yaxud səlahiyyətlərindən sui-istifadə barədə ictimaiyyətə məlumat verməlidir”.
Günel CƏLİLOVA
