“Bu gün Azərbaycan iqtisadiyyatı pandemiya böhranından sonra dirçəlib. Doqquz ayın rəqəmləri müsbətdir, iqtisadiyyat təxminən 5 faiz artıb, sənaye də artıb, qeyri-neft sənayesi isə təxminən 20 faiz artıb”. Bu rəqəmləri Prezident İlham Əliyev Füzuli rayon ictimaiyyətinin nümayəndələri ilə görüşündə səsləndirib.
Dövlət başçısı bildirib ki, bütün bu bərpa işləri böyük vəsait tələb etsə də, bunu öz imkanlarımız çərçivəsində edəcəyik: “Mən tam əminəm ki, bütün planlarımız maksimum qısa müddət ərzində həyatda öz əksini tapacaq, Qarabağ və Şərqi Zəngəzur nəinki Azərbaycanın, dünyanın ən gözəl yerlərindən birinə çevriləcəkdir”.
Aydın Hüseynov: “Ölkənin valyuta ehtiyatının kifayət qədər olması, manatın möhkəmliyini qoruyub saxlaması kimi amillər iqtisadiyyata təkanverici addımlardan biricidir”
Ölkə iqtisadiyyatında qeydə alınan inkişafla bağlı danışan millət vəkili Aydın Hüseynov bildirdi ki, 9 ayın nəticələrinə əsasən ölkə iqtisadiyyatı 5 faiz artıb: “Ölkə iqtisadiyyatının tərkib hissəsi olan qeyri-neft sənayesində 20 faiz artım qeydə alınıb. Ölkə iqtisadiyyatında qeydə alınan artım böyük göstəricidir.
Məlumdur ki, pandemiya bir çox ölkələrin iqtisadiyyatına öz təsirini göstərib. Azərbaycan iqtisadiyyatında isə iqtisadi irəliləyişlər açıq şəkildə müşahidə olunur. Bunun səbəbi odur ki, pandemiya zamanı ölkə başçısı İlham Əliyev mükəmməl bir proqram tərtib etdi. Həmin proqram həm karantin zamanı, həm də ondan sonrakı mərhələlər üçün ölkə iqtisadiyyatının dayanıqlığının saxlanılması istiqamətində atılan addımlar idi. Məlumdur ki, 4 milyona yaxın vətəndaşı əhatə edən sosial layihələrlə yanaşı, sahibkarlıq subyektlərinin inkişaf etdirilməsi üçün maliyyə dəstəyi göstərildi. Görülən və aparılan işlər sayəsində ölkə iqtisadiyyatı əvvəlki tempinə qayıtmaqdadır”.
Millət vəkili onu da əlavə etdi ki, ölkə iqtisadiyyatının neftdən asılılığının azaldılması, qeyri-neft sektorunun inkişaf etdirilməsi istiqamətində çoxlu sayda layihələr həyata keçirildi: “Həmçinin, sənaye sahələrinin inkişaf etdirilməsi üçün innovativ tədbirlər həyata keçirildi. Bu kimi işlərin nəticəsi olaraq ölkə iqtisadiyyatı əvvəlki vəziyyətinə qayıtmaqdadır. Onu da bildirim ki, ölkənin valyuta ehtiyatının kifayət qədər olması, manatın möhkəmliyini qoruyub saxlaması kimi amillər iqtisadiyyata təkanverici addımlardan biricidir. Ticarət dövriyyəsinin müsbət saldoda olması idxal və ixrac əməliyyatlarında iqtisadiyyata öz təsirini göstərdi”.
Pərviz Heydərov: “9 ayın yekunlarına əsasən, ölkə iqtisadiyyatında inkişaf qeydə alınır”
Iqtisadçı ekspert Pərviz Heydərov bildirdi ki, 9 ayın yekunlarına əsasən, ölkə iqtisadiyyatında inkişaf qeydə alınır: “Bu ilin əvvəlində ölkə iqtisadiyyatında tənəzzül prosesi qeydə alınırdı. Buna səbəb isə pandemiyanın iqtisadiyyata vurduğu təsirlər idi. Ancaq may ayından etibarən ölkə iqtisadiyyatında artım qeydə alınmağa başladı. Bu vəziyyət sonrakı aylar ərzində də özünü göstərdi”.
Iqtisadçının sözlərinə görə, ölkə iqtisadiyyatında qeydə alınan bərpa prosesi onu deməyə əsas verir ki, ötən il yaşanan tənəzzül daha yüksək rəqəmli artımla əvəz olundu.
Günel CƏLİLOVA
