Rusiyanın qərarı Azərbaycan fermerlərinə təsir göstərdi - problemli kreditlər çoxaldı…

Kamran Məmmədli: “Kənd təsərrüfatına verilən kreditlərin faiz dərəcələri çox yüksəkdir”

img

“2021-ci ilin əvvəlindən Rusiyanın Azərbaycandan ixrac olunan kənd təsərrüfatı məhsullarına məhdudiyyət tətbiq etməsi ölkəmizdə problemli kreditlərin artmasına səbəb olub”. Bu barədə 2021-ci ilin ilk yarısının maliyyə nəticələrinə həsr olunan mətbuat konfransında “PAŞA Bank” ASC-nin İdarə Heyətinin üzvü, baş maliyyə inzibatçısı Bəhruz Nağıyev bildirib.

O qeyd edib ki, burada mövcud olan iki başlıca səbəbdən biri aqrar sektordakı çətinliklərlə əlaqədardır: “Rusiya bir müddət Azərbaycan ixracatçılarına məhdudiyyətlər tətbiq etdi, 4 aya yaxın bir müddətdə çətinliklər yarandı. Bunun nəticəsində kreditlərdə gecikmələr oldu. Çünki müştərilər məhsulları ixrac edə bilmədilər, yollarda qalan məhsullar yararsız oldu, ümumiyyətlə bizneslərə çoxlu fəsadları oldu. Bu çətinliklər aqrar istehalçıların və ixracatçıların gəlirlərində də əks olundu və istər-istəməz bizdən də yan keçmədi. Belə ki, “PAŞA Bank” aqrar sektorda geniş fəaliyyət göstərir, çox ciddi maliyyələşmələr edir. İri fındıq, pomidor istehsalçıları bizim müştərilərdir. Ölkəmizin əsas ixracatçıları ilə əməkdaşlıq edirik. Bu şirkətlərin üzləşdikləri çətinliklər istər-istəməz bizə də təsir etdi”.

Bank rəsmisinin dediyindən belə aydın olur ki, aqrar sektorun çətinlikləri problemli kreditlərin artmasına səbəb olub. Maraqlıdır, bu sektorda yaşanan problemi necə həll etmək olar?

İqtisadçı Kamran Məmmədli bildirdi ki, kənd təsərrüfatının istehsalçıları daha yüksək keyfiyyətli, Avropa bazarı üçün məhsul istehsal etmək imkanına malik olmalıdır: “Ümumiyyətlə, xarici bazara çıxış imkanları genişləndirilməlidir. Məlumdur ki, daha çox Rusiyaya kənd təsərrüfat məhsulları ixrac olunur. Xarici bazara çıxış imkanı geniş əhatəli olarsa aqrar sektorla məşğul olanlar bu gün çətinliklə üzləşməzdilər. Kənd təsərrüfatına hər il investisiya qoyulmasına baxmayaraq, yetərincə deyil, həm də çox az hissəsi gəlib kəndliyə çatır. İlk olaraq investisiya artırılmalıdır. İkincisi isə hesabatlılıq yaranmalıdır ki, o investisiya fermerə, kəndliyə çatsın. Kənd təsərrüfatında yaşanan hər hansı problem banklara da mənfi təsir edir. Banklar tərəfindən də müəyyən problemlər var. Məsələn, kənd təsərrüfatına verilən kreditlərin faiz dərəcələri çox yüksəkdir. İnkişaf etmiş ölkələrdə kənd təsərrüfatına 6 faizdən yuxarı kredit vermirlər. Bizim kənd təsərrüfatına verilən kreditlər 15-20 faizdir. Bu faizlə verilən kreditdən kəndli, fermer hər hansı mənfəət əldə edə bilməz”.

Günel CƏLİLOVA

Son xəbərlər