Ötən ilin sonlarından etibarən Azərbaycanda tikinti materiallarının bahalaşması prosesi start götürüb. İlk olaraq bahalaşma sementdən başlayıb, bu ilin ötən dövründə dam örtükləri, taxta materialları və digər məhsulları əhatə edib. Bahalaşma daha çox taxtanın qiymətində müşahidə olunur.
Demək olar ki, hər ay Azərbaycanda taxtanın qiymətində rekord göstərici qeydə alınır. Davamlı bahalaşma hesabına ötən ay kəsilmiş taxtanın bir kub metrinin qiyməti orta hesabla 435 manatı ötüb. Bir il əvvəl Azərbaycanda taxtanın qiyməti 311 manat idi. Ötən 12 ay ərzində taxtanın bir kub metrinin qiyməti 124 manat və ya 40 faiz artıb. Taxtanın bahalaşması taxtadan hazırlanan inşaat materiallarının və mebellərin də bahalaşmasına səbəb olur.
Məlumat üçün bildirək ki, inşaat materiallarından ağas-yonqar lövhənin (DSP) 1 kvadrat metrinin qiyməti orta hesabla 10,7 manata yüksəlib. Bir il əvvəl ağas-yonqar lövhə 8,7 manata satılırdı. Ağas-yonqar lövhənin kvadrat metri 2 manat, yəni 23 faiz bahalaşıb. Ağas-lifli lövhənin (dikt) qiyməti bu ilin avqustunda 12 manatı ötüb. Bu tikinti materialı ötən ilin avqustunda 10 manata satılırdı. Ağas-lifli lövhənin qiyməti də 2 manat (20 faiz) artıb.
Parketin bir kvadratının orta dəyəri 23 manata yüksəlib. Ötən ilin avqustunda parketin qiyməti 21,4 manat idi. Bir il ərzində parket 7,5 faiz bahalaşıb.
Laminat parketinin qiyməti 15,6 manatı ötüb. Bu il laminat parket 0,7 manat və ya 4,7 faiz bahalaşıb.
Qeyd edək ki, taxtanın dəyərinin nəzərəçarpacaq dərəcədə artması taxtadan hazırlanan mebellərin də qiymətinə təsir göstərib. Artıq mebel dükanlarında mebellərin satış qiyməti ötən aylarla müqayisədə bahalaşıb.
“Müvafiq dövlət qurumları tikinti materialları bazarında qiymətləri nəzarətə götürüb, sui-istifadə hallarının qarşısını vaxtında almalıdır”
Iqtisadçı Kamran Məmmədli bildirdi ki, Rusiyada taxtanın ixrac rüsumunun artırılması Azərbaycan bazarında da ciddi qiymət artımına təsir edib: “Taxtanın bahalaşması fərdi tikililərin və taxtadan hazırlanan mebellərin satış qiymətinə təsir edib. Ümumiyyətlə, Azərbaycanda taxtanın və ondan hazırlanan məhsulların bahalaşması gözlənilirdi. Çünki bu ilin may ayına qədər dünyada taxtanın dəyəri bütün dövrlərin ən yüksək səviyyəsinə yüksəldi. Mayda qiymətlərin maksimum həddə çatmasını biz indi hiss edirik. Digər tərəfdən, Rusiya taxtanın xammal kimi ixracını çətinləşdirmək üçün gömrük rüsumlarını artırıb. Rusiya istəyir ki, ölkədən xaricə xammal yox, daha çox taxtadan istehsal edilən emal məhsulları satılsın. Bu da Rusiyadan idxal edilən taxtanın bahalaşması ilə nəticələnib”.
Həmsöhbətimiz hesab edir ki, müvafiq dövlət qurumları tikinti materialları bazarında qiymətləri nəzarətə götürüb, sui-istifadə hallarının qarşısını vaxtında almalıdır.
Günel CƏLİLOVA
