Ölkəmizdə fəaliyyət göstərən marketlərdəki süni bahalaşma vətəndaşların gündəlik rastlaşdıqları problemdir. Əksər ərzaq məhsullarında bahalaşma müşahidə olunur. Bu hal daha çox duru yağlarda qeydə alınıb.
Duru yağların qiymətinin bahalaşması sosial platformada da ciddi müzakirə mövzusuna çevrilib. Rusiya istehsalı olan duru yağlarla yanaşı, yerli istehsal olan yağlarda da qiymət artımı müşahidə olunur. Bu hal “Möcüzə” günəbaxan yağından da yan keçməyib.
Belə ki, bir neçə ay əvvələ kimi adıçəkilən duru yağın satış qiyməti 4 manat 20 qəpik olduğu halda, hazırda marketlərdə 2 litrlik “Möcüzə” günəbaxan yağı 9 manat 95 qəpiyə təklif edilir.
“Rusiyadan Azərbaycana günəbaxan yağı təkcə qablaşdırılmış şəkildə deyil, qablaşdırılmamış şəkildə də gətirilir və yerli istehsal adı altında bazara çıxarılır”
Qiymət artımı ilə bağlı fikir bildirən iqtisadçı ekspert Kamran Məmmədli qeyd etdi ki, günəbaxan yağlarının əksəriyyəti Rusiyadan idxal olunur. Məlum olduğu kimi, Rusiya qiymətləri stabil saxlamaqdan ötrü keçən ilin sonundan ixracı məhdudlaşdırdı: “Bu, Azərbaycanda da qiymət artımınına səbəb oldu. Əsas amillərdən biri isə gömrük orqanlarının bəyannamə qiymətini tətbiq etməsi və bu yolla yaradılan süni qiymət artımıdır. Eyni zamanda nəzərə almalıyıq ki, daxili istehsal kifayət qədər deyil, enerji daşıyıcılarının qiyməti çox bahadır”.
İqtisadçının sözlərinə görə, Azərbaycan özünün bitki yağına olan tələbatını 100 faiz idxal hesabına qarşılayır: “Ölkəmiz həm hazır məhsul idxal edir, həmçinin də xammal alır. Azərbaycan bu gün hazır bitki yağı ixrac etsə də, bu çox az həcmdədir. Biz 100 faiz bu məsələdə idxaldan asılıyıq. Bu halda da xaricdə xammalın qiymət artımı Azərbaycanda duru yağların qiymətinə avtomatik təsir edir. Onu da əlavə edim ki, Rusiyadan Azərbaycana günəbaxan yağı təkcə qablaşdırılmış şəkildə deyil, qablaşdırılmamış şəkildə də gətirilir və yerli istehsal adı altında bazara çıxarılır. İxrac rüsumunun artması onların da qiymətinə təsir göstərəcək. Ona görə də bu istiqamətdə Ukrayna və Belarusdan alternativ mənbə kimi istifadə edilməsində yarar var”.
Günel CƏLİLOVA
