Azərbaycanda otel sahibləri, otel idarəçiliyi və turizm fəaliyyəti ilə məşğul olan sahibkarlar banklardan cəlb etdikləri kreditlərin qaytarılmasında çətinliklə üzləşirlər. Onlar problemin həlli üçün Prezident İlham Əliyevə müraciət ünvanlayıblar.
İş adamları bildirirlər ki, pandemiya səbəbindən turist axınının dayanması və otellərin fəaliyyətinə tətbiq edilən məhdudiyyətlər onların gəlirlərinin kəskin azalmasına səbəb olub. Nəticədə vaxtilə biznesin inkişafı üçün banklardan götürülən kreditlərin qaytarılmasında çətinlik yaranıb. Sahibkarlar yaranmış vəziyyətlə bağlı indiyədək bir sıra dövlət qurumlarına, o cümlədən, Mərkəzi Bank və İqtisadiyyat Nazirliyinə müraciət etsələr də, məsələ həllini tapmayıb. Banklar isə kreditlərin qaytarılmasını tələb edirlər. Bununla əlaqədar iş adamları Prezidentdən məsələyə müdaxilə etməyi, otel sənayesi üçün güzəştlərin müddətini 2022-ci ilin martınadək uzatmağı xahiş ediblər.
Qeyd etdiyimiz kimi, otel sahibləri, otel idarəçiliyi ilə məşğul olan şəxslər banklardan götürdükləri krediti geri qaytara bilmədikləri üçün çıxış yolunu ölkə başçısı İlham Əliyevə müraciət etməkdə görürlər. Otel biznesi ilə məşğul olanlar düşünürlər ki, onlar vaxtilə bizneslərini genişləndirmək məqsədilə banklardan götürdükləri kreditləri geri qaytara bilməyəndə Prezident onların borcunu bağışlayacaq.
Bəli, başa düşürük ki, koronaviris infeksiyası ilə əlaqədar olaraq bir müddət otel və digər turizm obyektlərinin fəaliyyəti dayandırıldı. Qeyd olunan sektora aid obyektlərin fəaliyyətinə icazə verildikdən sonra turizm obyektləri itirdikləri gəliri geri qaytarmaq üçün qiymətləri birəbeş artırdılar. Belə ki, xarici ölkələrdə oteldə birgünlük gecələmə üçün 40-50 manat tələb edildiyi halda, bizim otellərdə qiymət 120-150 manatdır. Bununla yanaşı, otellər 50-60 qəpiklik “Coca-Cola”nı müştəriyə 4-5 manata satırlar. Həmçinin, kiloqramı 5-6 manat olan pendirin iki dilimi üçün 4-5 manat qiymət müəyyən ediblər. Bu kimi servis və xidmətlər üçün otellər daha yüksək qiymət müəyyən ediblər. Təbii ki, sərt karantin rejimindən çıxan əhali pulunu bahalı otellərə tökmək istəmir. Bu səbəbdən otellərə üz tutan müştərilərin sayı azalıb. Yaxşı olar ki, otel sahibləri və ya bu işlə məşğul olanlar günahı müştəridə deyil, özlərində axtarsınlar. Onlar qiymət siyasətinə dəyişiklik etsələr, qiymətləri hər kəsin büdcəsinə uyğun etsələr, otellər müştəri sarıdan əziyyət çəkməz.
Xatırladaq ki, pandemiyadan öncə də yerli turistlər istirahət üçün ölkədəki bahalı otellərə deyil, Gürcüstan və Türkiyəyə üz tuturdular. Səbəb isə yenə eyni idi. Bizim otellər daha artıq qazanc əldə etmək istəyirdilər. Ancaq yerli vətəndaşlar həmin pula Gürcüstan, Türkiyə və ya Rusiyada daha yaxşı istirahət edəcəklərini düşündükləri üçün qeyd olunan ölkələrə üz tuturdular.
Bu səbəbdən də otel sahibləri və turizm mərkəzləri bundan sonrakı dönəmdə daha ağır vəziyyətə düşmək istəmirlərsə, yanlış siyasətlərini dəyişməlidirlər. Sahibkarlar dövlətdən yardım istəməklə yanaşı, yaxşı olar ki, hər bir sahibkar dövlətinə, millətinə dəstək olsun.
Danılmaz faktdır ki, Azərbaycan son illər turizm sahəsinə böyük əhəmiyyət verir. Prezident İlham Əliyevin turizmin inkişafı istiqamətində verdiyi qərarlar, sərəncamlar, tövsiyələr, qaldırdığı təşəbbüslər kifayət qədər mühüm əhəmiyyət kəsb edir.
Günel CƏLİLOVA
