İşğaldan qurtulmuş bölgələrimizdə insanların iqtisadi fəallığını yüksəldən tədbirlərə start verildi - hələlik gəlir vergisi...

Vüqar Bayramov: “…güzəştli vergi sistemi rejimi tətbiq olunmalıdır”

img

Azərbaycanın rəşadətli ordusunun Dağlıq Qarabağda qalibiyyətindən sonra işğaldan azad olunan torpaqlarımızda tezliklə yenidənqurma işləri başlayacaq. İşğaldan azad olunan bütün ərazilərimizdə yenidənqurma işlərinin aparılması, sosial-iqtisadi, enerji, kommunal, nəqliyyat infrastrukturunun yaradılması, öz doğma yurdlarına qayıdan vətəndaşlarımızın yaşayışı və işgüzar fəaliyyəti üçün şəraitin təşkil edilməsi ən ümdə prioritet kimi qəbul edilib. Prezident İlham Əliyevin qeyd etdiyi kimi, “tezliklə bütün Qarabağda abadlıq, quruculuq, inkişaf başlayacaq”.

Onu da əlavə edək ki, azad edilmiş ərazilərdə qeyri-neft və qeyri-dövlət sektorunda çalışan işçilərin əksəriyyəti üçün gəlir vergisindən güzəştlərin olması təklif edilir. Ekspertlərin fikrincə, sahibkarların cəlb edilməsi və yeni iş yerlərinin yaradılması ilə güzəştli vergi sistemi tətbiq ediləcək.

  • “İşğaldan azad edilmiş bölgələrdə fəaliyyət göstərən sahibkarlar üçün faizsiz kreditlərin verilməsi imkanları yaradılmalıdır”

Millət vəkili, iqtisadçı-ekspert Vüqar Bayramov bildirdi ki, hazırda işğaldan azad edilən ərazilərdə yeni iş yerlərinin yaradılması prioritet məsələlərdən biridir: “İlk növbədə, həmin ərazilərdə bərpa mərkəzləri yaradılacaq. Bərpa mərhələsində infrastruktur yenidən qurulacaq. Kifayət qədər inşaat işi olacaq. Eyni zamanda, kommunal xidmətlərin verilməsi yeni iş yerlərinin yaradılmasına səbəb olacaq. Onu da əlavə edim ki, azad olunan ərazilərdə sahibkarlar və işçilər üçün müəyyən güzəştlər tətbiq edilməlidir. Azərbaycanda qeyri-neft və qeyri-dövlət sektorunda çalışan işçilərin əksəriyyəti üçün gəlir vergisindən güzəştlər olacaq. Bu da imkan verəcək ki, qeyri-neft sektorunda çalışanlar gəlir vergisi ödəməsinlər.

Düşünürəm ki, bu iş yerlərinin açılması zamanı bir neçə vacib məqama diqqət yetirilməlidir. İşğaldan azad edilən ərazilərdə açılacaq digər sahələrdə çalışan işçilərə əlavə müddətli güzəştlərin tətbiq edilməsi məqsədəuyğun olardı. Bu da, nəticə etibarilə, həmin sahələrdə çalışan şəxslərin daha çox əməkhaqqı almasına səbəb olacaq. Sahibkarların cəlb edilməsi və yeni iş yerlərinin yaradılması üçün güzəştli vergi sistemi rejimi tətbiq olunmalıdır. Müddətli olaraq bir sıra vergi dərəcələrinin endirilməsi məqsədəuyğun olardı. Çünki sahibkarların cəlb edilməsi və yeni iş yerlərinin yaradılmasına imkan verəcək. Digər tərəfdən, həmin bölgələrdə fəaliyyət göstərən sahibkarlar üçün faizsiz kreditlərin verilməsi imkanları yaradılmalıdır. Bunun üçün də ayrıca bir fond və ya mövcud Sahibkarların İnkişaf Fondu vasitəsilə həmin ərazilər üçün ayrıca şərtlərlə faizsiz, yaxud daha az faizlə kreditlərin ayrılması məqsədəuyğun olardı. Bu da imkan verəcək ki, həmin ərazilərdə fəaliyyət göstərən sahibkarlar daha geniş imkanlara malik olsunlar. Bütünlükdə, biz işğaldan azad edilən ərazilərdə iqtisadiyyatın qısa zamanda inkişafını, yeni iş yerlərinin yaradılacağını müşahidə edəcəyik”.

Günel CƏLİLOVA

Son xəbərlər