“…İlk növbədə, yerli sahibkarlar Azərbaycana sərmayə qoymalıdırlar. Bu gün Azərbaycan sahibkarları ölkəmizdə mövcud olan və gündən-günə möhkəmlənən sabitlikdən, əmin-amanlıqdan istifadə edərək, dövlətin onlara verdiyi dəstəkdən faydalanaraq, onlar üçün yaradılmış şəraitdən bəhrələnərək, iqtisadiyyatımızın liberallaşmasından xeyir görərək xarici ölkələrə böyük həcmdə sərmayə qoyurlar. Bu, təbiidir, dünya iqtisadiyyatı belə idarə olunur və bunu biz qadağan edə bilmərik. Ancaq xarici ölkələrə on milyonlarla dollar həcmində investisiya qoyan Azərbaycan sahibkarı, ilk növbədə, öz Vətənini düşünməlidir, öz insanlarımızı düşünməlidir. Onu düşünməlidir ki, bu gün pandemiya dövründə, neftin qiymətinin kəskin düşməsi şəraitində işsizlik arta bilər. Əlbəttə ki, bu, sahibkarların mənəvi öhdəliyi olmalıdır. Ona görə mən Azərbaycan sahibkarlarına üz tutub deyirəm ki, indiki şəraitdə sizin vəsaitiniz ölkə iqtisadiyyatının xeyrinə işləməlidir. Azərbaycana vəsait qoyun. Burada sizin vəsaitiniz ən yüksək səviyyədə qorunur…”.
Bu fikirləri Prezident İlham Əliyev Faiq Qürbətovu Biləsuvar, Elmir Bağırovu isə Saatlı rayon icra hakimiyyətlərinin başçısı vəzifələrinə təyin olunmaları ilə əlaqədar videoformatda qəbul edərkən deyib.
“Prezidentin çağırışını çox yüksək dəyərləndirirəm”
Ölkə başçısının xarici ölkələrə sərmayə qoyan azərbaycanlı sahibkarların Azərbaycan iqtisadiyyatına sərmayə qoymaları ilə bağlı çağırışlarının müsbət qiymətləndirildiyini deyən tanınmış iqtisadçı-ekspert Elşad Məmmədov bizimlə söhbətində bildirdi ki, sahibkarlarımızın xarici ölkələrə axıdılmış vəsaitlərinin sərmayə şəklində milli iqtisadiyyatımıza qaytarılması çox böyük effekt verəcək. Sahibkarların Prezidentin çağırışlarına müsbət cavab verəcəyini deyən E.Məmmədovun sözlərinə görə, dövlət başçısı Azərbaycandan xaricə axıdılmış özəl investisiya vəsaitlərinin qaytarılmasına rəsmən start verib. “Hesab edirəm ki, Prezidentin bu çağırışının böyük əhəmiyyəti var. Mən bir iqtisadçı kimi düşünürəm ki, xarici ölkələrə böyük sərmayələr qoyan Azərbaycan sahibkarları bu sərmayələri ölkəmizin iqtisadiyyatının inkişafına yönəltməlidirlər. Prezidentin çağırışını çox yüksək dəyərləndirirəm. Sahibkarlarımız ölkə başçısının bu çağırışına müsbət reaksiya verəcək və öz vəsaitlərini ölkəmizə gətirəcək, iqtisadiyyatımıza sərmayə qoyacaq. Bunun isə əhəmiyyəti çox böyük olacaq. Sahibkarlarımız xaricə yönəltdikləri sərmayələri ölkə iqtisadiyyatına qoysalar, yeni iş yerlərinin sayı artacaq, yüzlərlə insan işlə təmin olunacaq. Bu isə olduqca müsbət bir haldır. Vətənini, dövlətini, xalqını sevən, iqtisadiyyatımızın inkişaf etməsini həqiqətən də istəyən sahibkarların tez bir zamanda öz vəsaitlərini ölkəmizə, iqtisadiyyatımızın inkişafına yönəldəcəyinə inanıram. Sahibkar dövlətini, xalqını sevirsə, belə də etməlidir” - deyə E.Məmmədov qeyd etdi.
İradə SARIYEVA
