“Yeni generasiya güclərinin yaradılması bizim ümumi inkişafımızın təzahürüdür. Çünki enerji sistemimizin müasirləşdirilməsi ölkəmizin ümumi inkişafı ilə uzlaşır və bütün işlər planlı şəkildə aparılır”.
Bu barədə Prezident İlham Əliyev “Qobu” Elektrik Stansiyasının təməlqoyma mərasimindən sonra energetiklərlə görüşündə bildirib.
Ölkə başçısının sözlərinə görə, infrastruktur layihələri arasında elektrik stansiyalarının tikintisi xüsusi yer tutur: “Biz birinci növbədə bu məsələ ilə məşğul olmağa başlamışdıq. Təsadüfi deyil ki, 2004-cü ildə qəbul edilən Regionların sosial-iqtisadi inkişafına dair birinci Dövlət Proqramında elektrik stansiyalarının tikintisi xüsusi nəzərə alınmışdır. O vaxtdan bu günə qədər ölkəmizdə 30-dan çox elektrik stansiyası tikilib. İndi təsəvvür edin, əgər bunlar tikilməsəydi, bu gün biz yenə də əvvəlki illərdəki kimi, idxaldan asılı vəziyyətdə olacaqdıq və öz enerji təhlükəsizliyimizi təmin edə bilməyəcəkdik. Məhz elektroenergetika sahəsinə göstərilən diqqət və ayrılan dövlət sərmayəsi imkan verdi ki, bu gün biz öz tələbatımızı tam şəkildə ödəyirik. Eyni zamanda, bizdə güclü ixrac potensialı yaranmışdır. Daxili tələbatımızın artmasına baxmayaraq, bizim ixrac potensialımız ildən-ilə artır. 2004-cü ildən bu günə qədər bizim iqtisadiyyatımız və o cümlədən, sənaye potensialımız üç dəfədən çox artmışdır. Müasir texnologiyaların tətbiqi nəticəsində Azərbaycanda həm generasiya gücləri yaranır, eyni zamanda, itkilər də azalmaqdadır”.
Görünən odur ki, elektrik enerjisi istehsalında Azərbaycan ciddi uğurlara imza atıb. Məsələ ondadır ki, Azərbaycanın sənaye istehsalı, əhalisi artdıqca, enerjiyə olan tələbat yüksəlir. Ölkəmiz davamlı olaraq bu tələbatı ödəmək gücündədir və təsadüfi deyil ki, son illər görülən kompleks işlər nəticəsində fasiləsiz olaraq enerj təminatı sistemi yaradılıb. Bu da təsadüfi deyil. Ona görə ki, Prezident İlham Əliyevin vaxtında həyata keçirdiyi məqsədyönlü tədbirlər Azərbaycanın enerji təhlükəsizliyini təmin edib. Bu isə ölkənin yüksələn iqtisadi potensialı fonunda mühüm əhəmiyyət kəsb edir.
Sözügedən məsələni baki-xeber.com-a şərh edən ekspert Rəsul Cahangirlinin fikrincə, əhalinin və iqtisadiyyatın elektrik enerjisinə olan tələbatının dayanıqlı şəkildə təmin edilməsi ciddi uğurdur: “Bu, əslində, ölkənin dinamik inkişafının təmin olunması deməkdir. Hansı ki, elektrik enerjisi istehsalında Azərbaycan ciddi uğurlara imza atıb. Ölkə enerjini idxal edən ölkədən elektrik enerjisi ixrac edən dövlətə çevrilib. Bunu rəqəmlər də sübut edir. Belə ki, 2006-cı ildə Azərbaycan illik 1,7 milyon kv/saat elektrik enerjisi idxal edirdisə, görülən tədbirlər artıq 2020-ci ildə Azərbaycanın 1,5 milyon kv/saat-a yaxın enerji ixrac etməsinə imkan yaradıb. İstehsalın ötən müddətdə qorunub saxlanması fonunda biz istehlakın azalmasını müşahidə etmişik. İstehlakın azalması da itkinin kəskin aşağı salınması ilə bağlıdır. Əvvəlki illərlə müqayisədə enerji sektorunda itkilər kəskin şəkildə azalıb. Tələbin artması fonunda Azərbaycan bunu artıqlamasi ilə qarşılaya bilir. Eyni zamanda, Azərbaycanın elektrik enerjisi ixracı imkanları da artır ki, bunun sayəsində ölkəyə əlavə valyuta daxil olur. Güman edilir ki, yaxın illərdə Azərbaycanın elektrik enerjisi ixracı imkanları daha da genişlənəcək və bu, ölkəyə böyük həcmdə valyutanın daxil olmasına imkan yaradacaq”.
Ekspertin fikrincə, sözügedən sahə Azərbaycanda rasional şəkildə inkişaf edir.
Vidadi ORDAHALLI
