“Azərbaycanda 440 meqavat gücündə bərpaolunan enerji növlərinin yaradılması, özü də Azərbaycan dövləti tərəfindən bir manat vəsait qoyulmadan reallaşdırılması bizə olan inamın təzahürüdür”.
Bu fikirləri Prezident İlham Əliyev 385 meqavatlıq “Qobu” Elektrik Stansiyasının təməlqoyma mərasimindən sonra energetiklərlə görüşündə bildirib.
Prezidentin sözlərinə görə, biz ənənəvi enerji növlərinin istehsalı ilə əlaqədar işlərimizi davam etdirmək əzmindəyik: “Biz xarici və yerli investorları istilik elektrik stansiyalarının tikintisinə dəvət edirik. O cümlədən, onları su elektrik stansiyalarının və digər bərpaolunan enerji stansiyalarının tikintisinə cəlb etmək istəyirik. Əgər belə maraq olarsa, hesab edirəm ki, qısa müddət ərzində bu məsələ öz həllini tapa bilər. Çünki bu gün Azərbaycanda investisiya qoyuluşu sayəsində çox böyük işlər görülür, Azərbaycanda biznes mühiti yaxşılaşır”.
Ölkə başçısının fikrincə, sevindirici hal ondan ibarətdir ki, bu gün dünyanın ən böyük enerji şirkətləri Azərbaycanda bərpaolunan enerji növlərinin istehsalına maraq göstərirlər: “Artıq bu maraq reallaşır. İlin əvvəlində iki böyük beynəlxalq şirkətlə 440 meqavat generasiya gücü olan günəş və külək elektrik stansiyalarının tikintisi ilə əlaqədar müvafiq sənədlər imzalanmışdır. Ümid edirəm ki, ilin sonuna qədər bütün sənədlərin imzalanması başa çatacaq və stansiyaların tikintisinə start veriləcək. Azərbaycanda 440 meqavat gücündə bərpaolunan enerji növlərinin yaradılması, özü də Azərbaycan dövləti tərəfindən bir manat vəsait qoyulmadan reallaşdırılması bizə olan inamın təzahürüdür, həmçinin, Azərbaycanın sabit gələcəyinə, inkişafına olan inamın təzahürüdür”.
Görünən odur ki, Azərbaycana olan inamın nəticəsidir ki, xarici şirkətlər sözügedən enerji sahəsinə vəsait qoyurlar. Bu çox önəmli göstəricidir. O baxımdan bunun əhəmiyyətini ekspertlər necə dəyərləndirirlər?
“...xarici şirkətlərin yaxından iştirak etməsi ciddi iqtisadi perspektivlər vəd edir”
Məsələyə münasibət bildirən millət vəkili Aydın Hüseynovun sözlərinə görə, Azərbaycanda investisiya mühiti olduqca əlverişli olduğuna görə xarici sərmayədarlar enerji sektoruna belə böyük maraq göstərirlər: “Ölkəyə sərmayənin cəlb olunması, birinci növbədə, qanunvericiliklə bağlıdır. Yəni ölkədəki qanunvericilik investorun hüquqlarını qoruyurmu, bununla bağlı baza varmı? İkinci bir tərəfdən, ölkədə stabilliyin mövcud olmasına önəm verilir. Stabilliyin risq altında olub-olmamasına diqqət edilir. Məhz bu kimi amillər xarici sərmayədarları daha çox maraqlandırır. Bu gün bunların hamısı Azərbaycanda var. Prezident İlham Əliyevin gördüyü işlər sayəsində xarici investorlara hərtərəfli şərait yaradılıb. İnvestorların hüquqlarının qorunması istiqamətində sistemli işlər görülüb. Sahibkarlara həm iqtisadi, həm də siyasi dəstək verilir. Bunun nəticəsidir ki, böyük xarici şirkətlər bərpaolunan enerji növlərinin yaradılmasına sərmayə qoyurlar. Hesab edirəm ki, bu çox önəmli amildir. Bu, ölkə iqtisadiyyatı və enerji sektoru üçün çox vacib məsələdir. Nəzərə almaq lazımdır ki, sənayenin və ümumiyyətlə, iqtisadiyyatın inkişafında enerji çox vacib rol oynayır. Çünki bütün məhsulların maya dəyərinə enerji qiymətləri təsir edir. Bu isə onu göstərir ki, ölkə iqtisadiyyatında bu kimi böyük layihələrin reallaşması ciddi stimullaşdırıcı faktor rolunu oynayacaq. Nəzərə almaq lazımdır ki, bərpaolunan enerji növləri ilə bağlı Azərbaycanın böyük potensialı var. Bu potensialdan istifadə olunmasında xarici şirkətlərin yaxından iştirak etməsi ciddi iqtisadi perspektivlər vəd edir”.
Millət vəkilinin fikrincə, Azərbaycanın enerji sektoruna xarici şirkətlərin marağı artan xətt üzrə davam edəcək. Çünki investorlara hərtərəfli şərait yaradılıb.
Vidadi ORDAHALLI
