Məlum olduğu kimi, pandemiya dövründə ölkədə tətbiq edilən karantin rejiminin tələblərinə uyğun olaraq, bir sıra iş yerləri müvəqqəti olaraq fəaliyyətini dayandırdı.
Bu dövrdə fəaliyyətini davamlı şəkildə davam etdirən banklar, elektron və digər məhsulları kreditlə satan şirkətlər oldu. Amma bəzi banklar və kredit verən şirkətlər onlardan kredit götürən vətəndaşlara güzəştlər etməyə maraq göstərmədilər. Halbuki, ölkə başçısı çıxışlarında banklara əhalinin vəziyyətini nəzərə almaları ilə bağlı çağırışlar da edib. Bundan başqa, Mərkəzi Bankın da banklara tövsiyəsi olub ki, banklar sentyabrın 30-na qədər gecikdirməyə görə müştəriləri cərimələməsinlər.
Banklar krediti gecikdirən müştərilərə güzəşt tanımalı, onlardan gecikdirməyə görə əlavə faiz tələb etməməli olduqları halda, krediti gecikdirən müştərilərə cərimə yazmadan çəkinmədilər. Hətta “İrşad” və digər şirkətlər də gecikdirməyə görə müştəriləri cərimələyiblər.
Müştərilərdən biri bizimlə söhbətində bildirdi ki, 65 yaşı olduğu üçün tələb olunan müddətə qədər sosial təcriddə olub, bu səbəbdən də bir neçə ay kredit borcunu gecikdirib, krediti ödəmək üçün şirkətin mağazasına gələndə isə ondan əlavə faiz tutublar ki, sən krediti gecikdirmisən. Müştərilərin banklardan və kredit verən şirkətlərdən bu kimi şikayətləri ilə son vaxtlar tez-tez rastlaşdığımız üçün məsələni gündəmə gətirmək istədik. Onu da vurğulayaq ki, məsələ ilə bağlı hansı banka, hansı şirkətə müraciət etdiksə, hamısı baş verənləri inkar etdi.
Bankların və bəzi şirkətlərin karantin dövründə müştərilərə əlavə cərimə yazması, onlardan gecikdirməyə görə faiz tutması nə dərəcədə düzgündür?
“...bunu gizli-gizli, üstüörtülü şəkildə edirlər, müştəriləri sıxma-boğmaya salırlar, incidirlər”
Bank üzrə tanınmış ekspert Əkrəm Həsənov “Bakı-Xəbər”ə bildirdi ki, həqiqətən də bəzi banklar verilən tövsiyələrə əməl etməyiblər. “Mərkəzi Bank aprel ayında bütün banklara tövsiyə etmişdi ki, sentyabrın 30-na qədər gecikməni gecikmə hesab etməsinlər və müştəriləri cərimələməsinlər. Birincisi, bu tövsiyədir, bankların buna əməl etməsi könüllüdür. Banklar müştərini açıq-aşkar cərimələmirlər, bunu gizli-gizli, üstüörtülü şəkildə edirlər, müştəriləri sıxma-boğmaya salırlar, incidirlər. Hələ aprel ayında bu tövsiyə veriləndə dedim ki, bankların çoxu buna əməl etməyəcək, elə də oldu. O ki, qaldı “İrşad”, “Kontakt” və sair kimi kredit verən şirkətlərə, iri ticarət mərkəzlərinə, bu tövsiyə, istənilən halda, onlara aid deyil, bu, banklara aid idi. Vətəndaşların evdən yalnız 2 saatlığına çıxmaq icazəsi olanda belə şərh verirdilər ki, o bu 2 saat ərzində bank xidmətlərindən istifadə edə bilər. Təəssüf ki, bu məsələdə qanun bankların tərəfindədir. Bunun üçün də vətəndaşlar Prezidentə müraciət etməlidirlər ki, Mərkəzi Bank banklara belə bir tövsiyə verib, amma banklar ona əməl etmirlər. Problemin həlli yalnız bu cür mümkün ola bilər” - deyə Ə.Həsənov bildirdi.
İradə SARIYEVA
