Məlum olduğu kimi, yeni növ koronavirus (COVID-19) infeksiyasının Azərbaycanda yayılması ilə bağlı mövcud sanitar-epidemioloji vəziyyəti təhlil edən Nazirlər Kabineti yanında Operativ Qərargah ölkə üzrə karantin rejiminin avqustun 31-dək uzadılması barədə qərar qəbul edib.
Mövcud sanitar-epidemioloji vəziyyətə uyğun olaraq respublikanın 13 şəhər və rayonunda sərt karantin rejimi də həmin tarixə qədər artırılıb. Bununla belə, bəzi yumşaldılmalar barədə də qərar verilib. SMS-lə icazənin ləğv edilməsi, çimərliklərdən istifadəyə icazə verilməsi və s. buraya daxildir.
Onu da qeyd edək ki, COVID-19 infeksiyasına yoluxmanın dinamikasında müsbət tendensiyanın müşahidə olunması və iqtisadi aktivliyin gücləndirilməsi zərurəti nəzərə alınaraq, Nazirlər Kabineti yanında Operativ Qərargah bəzi istehsal, ticarət və xidmət sahələrinin fəaliyyətinə icazə verilməsi haqda qərar qəbul edib.
“Elə istehsal sahələri var ki, onlar işləməlidir”
Xüsusi karantin rayonlarında istehsalat və xidmət sahələrinin açılmasının iqtisadi fəallığa müsbət təsir etməsinin əhəmiyyəti haqqında danışan millət vəkili Vahid Əhmədov qeyd etdi ki, koronavirus dünya iqtisadiyyatını çökdürdüyü kimi, Azərbaycan iqtisadiyyatına da müəyyən təsirlər göstərib: “Karantin uzun müddət davam edərsə, dövlət büdcəsində müəyyən problemlər yarana bilər. Xüsusilə restoranlar, kafelər, xidmət sahələri, böyük mollar, o cümlədən, "Sədərək”, "Binə” ticarət mərkəzləri açılmalıdır. Amma həmin yerlərdə ciddi karantin rejimi tətbiq olunmalıdır. Məsafə saxlamaq, maska taxmaq və s. bununla bağlı dövlətlərdə təcrübə var, onlar artıq həyata keçirilir. Uzun müddət insanları işsiz saxlamaq düzgün deyil. Bunu Prezident öz çıxışında da dedi. Dedi ki, artıq karantin insanları bezdirib. Hesab edirəm ki, yaxın vaxtlarda Nazirlər Kabineti yanında Operativ Qərargah belə bir qərar verəcək və yumşaldılma prosesi davam edəcək. Müəyyən sahələrin işləməsinə icazə veriləcək. Elə istehsal sahələri var ki, onlar işləməlidirlər. Onların işləməsi Azərbaycanın dövlət büdcəsinə əlavə vəsait gətirə bilər ki, biz ilin sonunda ciddi problemlərlə üzləşməyək”.
Həmsöhbətimizin dediyindən belə qənaət hasil oldu ki, karantin rejiminin yumşaldılması ilə bəzi istehsalat sahələrinin fəaliyyətinə icazə verilməsi iqtisadi fəallığın artmasına səbəb olacaq.
Günel CƏLİLOVA
