“Dövlət-özəl sektor tərəfdaşlığı gərək daha konkret layihələr əsasında özünü göstərsin”. Bunu Prezident İlham Əliyev ölkəmizdə koronavirus pandemiyası ilə mübarizə sahəsində görülən tədbirlər və sosial-iqtisadi vəziyyətlə bağlı videoformatda keçirilən müşavirədə çıxışı zamanı deyib.
Dövlət başçısının fikrincə, Azərbaycanda dövlətin və özəl sektorun birgə sərmayə qoyduğu layihələr çox azdır: “Mən artıq qeyd etdim ki, dövlət-özəl sektor tərəfdaşlığı gərək daha konkret layihələr əsasında özünü göstərsin. Deyə bilərəm ki, bu, hələ bir çox hallarda niyyət olaraq qalır. Bizdə bir neçə layihədə dövlət və özəl şirkətlər fəaliyyət göstərirlər, sərmayə qoyublar. Amma bu layihələrin sayı çox azdır. Ona görə burada mütləq yeni yanaşma olmalıdır. Bəlkə də hansısa yeni sahələrdə, hətta infrastruktur layihələrində özəl sektor fəaliyyət göstərə bilər. Bu da mümkündür. Təkcə sənaye müəssisələrinin yaradılmasında yox, infrastruktur layihələrində. Onları, sadəcə olaraq, stimullaşdırmaq lazımdır. Eyni zamanda, biz xarici tərəfdaşları da bu işlərə cəlb etməliyik. Əlbəttə, xərclərə dövlət nəzarəti mexanizmi daha da təkmil olmalıdır. Burada, əlbəttə ki, dövlət qurumları konkret əlavə təkliflər verməlidirlər”.
Göründüyü kimi, dövlət-özəl sektor tərəfdaşlığını canlandırmaq zərurəti yaranıb. Hansı ki, indiki dövrdə buna böyük ehtiyac var. O üzdən, sözügedən məsələ ilə bağlı ekspertlərin təklifləri nədən ibarətdir? Bununla bağlı hansı işlər görülməlidir?
“...müxtəlif şirkətləri payçı kimi dəvət etməklə bu sahədə uğurlu tərəfdaşlıq qurmaq olar”
Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyev bununla bağlı bir sıra məqamlara toxundu: “Dövlət-özəl sektor tərəfdaşlığı deyəndə dövlət layihələrində özəl sektorun yaxından iştirak nəzərdə tutulur. Eyni zamanda, birgə layihələrin həyata keçirilməsi bura daxildir. Bu nədən ibarətdir? Dövlətin göstərdiyi iş və xidmətlərin bir hissəsini özəl sektora vermək. Konkret olaraq nazirliklər, baş idarələr bir sıra işlər görürlər. Məsələn, sözügedən qurumlar təchizat, maarifləndirmə işlərini həyata keçirirlər. Bunları özəl sektora vermək, tenderlər əsasında bu işləri tənzimləmək mümkündür. Bunun sayəsində həm birgə layihələrin sayı artacaq, həm də keyfiyyətə nail olmaq mümkün olacaq. Eyni zamanda, bunun sayəsində vəsaitə qənaət etmək mümkün olacaq. Dövlətin müəyyən layihələrinin həyata keçirilməsi zamanı bu imkanlardan faydalanmaq olar. Qiymətli kağızlar bazarından istifadə etməklə, müxtəlif şirkətləri payçı kimi dəvət etməklə bu sahədə uğurlu tərəfdaşlıq qurmaq olar. Bu minvalla, özəl sektorun prosesdə iştirakını və maliyyə vəsaiti cəlb etməsini təmin etmək olar. Ən nəhayət, səhmdar cəmiyyətləri yaratmaqla sözügedən sahədə geniş işlər görmək olar. Bunun sayəsində birgə idarəçilik sistemi qurmaq mümkündür”.
Ekspertin fikrincə, bu sahədə potensial böyükdür, sadəcə, işin düzgün təşkilinə və digər bu kimi işlərin görülməsinə ehtiyac var.
Vidadi ORDAHALLI
