18/09/2020 11:46
728 x 90

Azərbaycanda ictimai nəzarətə daha geniş cəbhə açıldı - Prezidentin tələbi tam icra olunsa…

Rauf Zeyni: “Vətəndaş cəmiyyəti ölkə Prezidentinin bu çağırışından sonra daha da ruhlanacaq”

img

Prezident İlham Əliyev ölkəmizdə koronavirus pandemiyası ilə mübarizə sahəsində görülən tədbirlər və sosial-iqtisadi vəziyyətlə bağlı videoformatda keçirilən müşavirədə çıxışı zamanı bütün layihələrin icrasında ictimaiyyət nümayəndələrinin iştirak etməsinin zəruriliyindən danışıb:

"Mən artıq qeyd etdim ki, dövlət-özəl sektor tərəfdaşlığı gərək daha konkret layihələr əsasında özünü göstərsin. Deyə bilərəm ki, bu hələ bir çox hallarda niyyət olaraq qalır. Bizdə bir neçə layihədə dövlət və özəl şirkətlər fəaliyyət göstərirlər, sərmayə qoyublar. Amma bu layihələrin sayı çox azdır. Ona görə burada mütləq yeni yanaşma olmalıdır. Bəlkə də hansısa yeni sahələrdə, hətta infrastruktur layihələrində özəl sektor fəaliyyət göstərə bilər. Bu da mümkündür. Təkcə sənaye müəssisələrinin yaradılmasında yox, infrastruktur layihələrində. Onları, sadəcə olaraq, stimullaşdırmaq lazımdır. Eyni zamanda, biz xarici tərəfdaşları da bu işlərə cəlb etməliyik.

Əlbəttə, xərclərə dövlət nəzarəti mexanizmi daha da təkmil olmalıdır. Burada, əlbəttə ki, dövlət qurumları konkret əlavə təkliflər verməlidirlər və ictimai nəzarət olmalıdır. Bizim üçün böyük əhəmiyyət kəsb edən bütün layihələrin icrasında ictimaiyyət nümayəndələri iştirak etməlidirlər. Mən su ilə bağlı müşavirədə qeyd etdim. Alimlər, qeyri-hökumət təşkilatları, mütəxəssislər, media nümayəndələri - onlar da bu işlərdə iştirak etsinlər. Onlar öz təkliflərini versinlər. Yəni geniş ictimaiyyət gərək bu işlərə cəlb olunsun. Onda bizim işimiz daha rahat gedəcək və xərclərə nəzarət mexanizmi bir neçə təbəqədən ibarət olacaq.

Biz bütün bu işləri onsuz da görməli idik və görürük. Bizim niyyətimiz və siyasətimiz artıq birmənalı şəkildə vətəndaşlara təqdim edilib. Şəffaflıq, dürüstlük, kölgə iqtisadiyyatının əhatə dairəsinin daralması, biznes mühitinin yaxşılaşdırılması və bu istiqamətdə bundan sonra atılacaq addımlar əminəm ki, həm pandemiya dövründə, həm də postpandemiya dövründə bizə yeni imkanlar qazandıracaq".

Göründüyü kimi, ölkə başçısı icra olunan dövlət layihələri ilə bağlı ictimai nəzarətin vacibliyini bir daha vurğulayıb. Onun budəfəki təklifində belə nəzarəti həyata keçirmək üçün daha geniş spektrli ixtisas sahiblərinin iştirakı yer alır. Prezidentin bu tələbi icra olunsa, biz hansı keyfiyyət dəyişikliklərini müşahidə edə bilərik?

Milli Qeyri Hökumət Təşkilatları Forumunun prezidenti Rauf Zeyni “Bakı-Xəbər”ə açıqlamasında bildirdi ki, Prezidentin ictimai nəzarətin genişlənməsi ilə bağlı ölkə ictimaiyyətinə çağırış etməsi hər zaman aktual olub:“Bundan əvvəl də ölkə başçısı vətəndaşları ictimai nəzarətdə yaxından iştirak etməyə səsləmişdi. İndiki çıxışında isə Prezident daha konkret sahələrdəki peşə sahiblərini bu nəzarətdə yaxından iştirak etməyə çağırıb. Biz bunu olduqca vacib çağırış kimi qiymətləndiririk. Vətəndaş cəmiyyətinin təmsilçisi kimi mən öz adımızdan ölkə başıçısına təşəkkürmü bildirirəm ki, bizə belə böyük etimad göstərib. Mahiyyət etibarı ilə bu bizim səlahiyyətimizə aid olan məsələdir. Çünki QHT-lərin əsas fəaliyyət istiqaməti maarifləndirmə, monitorinq və ictimai nəzarətin aparılması üzərində qurulub. Biz bir sıra məsələlərlə bağlı bu fəaliyyəti yüksək səviyyədə həyata keçirmişik. Mənim özüm uzun müddətdir ki, dövlət qurumlarında ictimai nəzarəti həyata keçirən QHT rəhbəri kimi təmsil olunuram. Bu təcrübəmdən çıxış edərək bildirirəm ki, ölkədə şəffaflığın təmin olunmasının yolu ictimai nəzarətin güclü olmasından keçir. Biz 5 il əvvəl Milli Qeyri Hökumət Təşkilatları Forumunda “MDF Monitorinq Komissiyası” adlı bir qurum yaratmışıq. Bütün zamanlarda ictimai monitorinqlərin aparılması, bu yöndə olan dinləmələrin həyata keçirilməsi istiqamətində fəaliyyətimizi davam etdirmişik. Düşünürəm ki, vətəndaş cəmiyyəti ölkə Prezidentinin bu çağırışından sonra daha da ruhlanacaq. Bu bizə daha səylə çalışmaq üçün ciddi stimul rolunu oynayacaq. Biz bu yöndə işimizi daha yüksək səviyyədə, ölkə başçısının çağırışlarına uyğun şəkildə qurmaq üçün təcili tədbirlər görəcəyik. Hesab edirəm ki, əlaqədar qurumlar da belə ictimai nəzarətlər üçün açıq olmalı, bu yöndə heç bir maneçiliklər törətməməlidirlər”.

Ümid edirik ki, ölkə başçısının bu çağırışında adlarını çəkdiyi bütün peşələrin sahibləri ictimai nəzarətin yüksək səviyyədə həyata keçirilməsində öz fəallıqlarını əsirgəməyəcəklər.

Məhəmmədəli QƏRİBLİ

Son xəbərlər