“İqtisadi sahədə itkilərimiz var. Ancaq bu itkilər daha genişmiqyaslı ola bilərdi”. Bunu Prezident İlham Əliyev ölkəmizdə koronavirus pandemiyası ilə mübarizə sahəsində görülən tədbirlər və sosial-iqtisadi vəziyyətlə bağlı videoformatda keçirdiyi müşavirədə bildirib.
Ölkə başçısının sözlərinə görə, inkişaf etmiş ölkələrlə müqayisədə son 6 ayda Azərbaycanda iqtisadi azalma elə də böyük deyil: “İqtisadiyyatımız 6 ayda cəmi 2,7 faiz azalıb. Burada neftin qiymətinin aşağı düşməsi rol oynayıb. Eyni zamanda, OPEC+ çərçivəsində götürdüyümüz öhdəliklər də öz rolunu oynadı. Çünki biz hasilatı ixtisar etdik. İndi bəzi inkişaf etmiş ölkələrdə iqtisadi tənəzzül 10, 14, 20 faiz, ondan da çoxdur. Əlbəttə ki, bu ölkələrə baxdıqda bizdə vəziyyət daha yaxşıdır. Ancaq yenə də iqtisadi inkişafımız təmin edilməlidir. Hesab edirəm ki, bu ilin sonuna qədər görüləcək işlər, xüsusilə, sahibkarlıqla bağlı olan işlər, eyni zamanda, dövlət şirkətlərinin idarə edilməsi istiqamətində atılacaq addımlar bu iqtisadi canlanmanı təmin etməlidir, itkiləri azaltmalıdır”.
Göründüyü kimi, inkişaf etmiş ölkələrlə müqayisədə bizdə azalma böyük deyil. Hansı ki, sözügedən ölkələrdə iqtisadi tənəzzül daha böyük faizlərlə ölçülür. O baxımdan, Azərbaycanın bu üstünlüyünü ekspertlər necə dəyərləndirirlər?
“Bütün bunların məntiqi nəticəsi olaraq, bir sıra ölkələrlə müqayisədə Azərbaycanda iqtisadi azalma böyük deyil”
Məsələyə münasibət bildirən iqtisadçı-ekspert Fuad İbrahimov Azərbaycanda iqtisadi azalmanın elə də böyük olmamasını bir sıra amillərlə əlaqələndirdi: “Məsələ ondadır ki, 2015-ci ildə Azərbaycanda 2 dəfə devalvasiya baş verdi. Böhran əsasən maliyyə sektorunda baş verdiyinə görə ölkədə bir sıra işlər görüldü. Koronavirus pandemiyası ilə əlaqədar olaraq dünyada həm neftin qiyməti ucuzlaşır, həm də digər sahələrdə tənəzzül var. Bütün bunlara baxmayaraq, Azərbaycan iqtisadiyyatında elastiklik yaranıb. Elastiklik də ona görə yaranıb ki, 2015-ci ildən sonra bu kimi problemlərin yenidən yaranmasının qarşısını almaqdan ötrü iqtisadiyyatda qabaqlayıcı tədbirlər görüldü. 2019-cu ilin bütün göstəriciləri ilə ölkə iqtisadiyyatı müəyyən artımlar əldə etdi. Koronavirus pandemiyası geniş vüsət almadan, paralel olaraq neft qiymətləri kəskin ucuzlaşmadan bizdə qabaqlayıcı tədbirlər görülürdü. Məlum olduğu kimi, Prezidentin təşəbbüsü ilə hökumət tədbirlər planı hazırladı. Hamsının da icra mexanizmləri var və həyata keçirilir. Bax, bütün bu göstəricilərin hamısı iqtisadiyyatımıza dəyə bilən ziyanı maksimal şəkildə minimumlaşdırıb. Risqlərin minimumlaşdırılması istiqamətində hökumət tərəfindən bütün addımlar atılıb. Bütün bunların məntiqi nəticəsi olaraq, bir sıra ölkələrlə müqayisədə Azərbaycanda iqtisadi azalma böyük deyil”.
Göründüyü kimi, həyata keçirilən kompleks tədbirlər sayəsində Azərbaycanın iqtisadi itkiləri böyük deyil.
Vidadi ORDAHALLI
