Son illərdə əldə edilən bütün sosial-iqtisadi uğurlar ölkə iqtisadiyyatının dinamik inkişafı, islahatların ardıcıl xarakter daşıması ilə bağlı olub.
Hazırda ölkə iqtisadiyyatının dayanıqlığının şaxələndirilməsi və rəqabət qabiliyyətinin təmin edilməsi qarşıya iqtisadi islahatlar üzrə əsas vəzifə kimi qoyulub. Bu məqsədlə sahibkarlıq fəaliyyətinin genişləndirilməsi, investisiya və biznes mühitinin daha da yaxşılaşdırılması, qanunvericilik bazasının təkmilləşdirilməsi, institusional islahatların aparılması, dövlət tərəfindən sahibkarlara hərtərəfli dəstək verilməsi istiqamətlərində bir sıra mühüm qərarlar qəbul edilib. Bütün bunların sayəsində Azərbaycan son illər dünyanın ən sürətlə və dayanıqlı inkişaf edən ölkəsinə çevrilib.
Azərbaycanın strateji valyuta ehtiyatları ildən-ilə əhəmiyyətli dərəcədə artır. Bunu son 5 ilin statistik göstəriciləri də sübut edir. Belə ki, 2015-ci ildə ölkənin strateji valyuta ehtiyatları 37 milyard dollar idisə, 2016-cı ildə bu 39 milyard, 2017-ci ildə 41 milyard, 2018-ci ildə 45 milyard, 2019-cu ildə isə 50,9 milyard dollar olub. Bu il avqustun 1-nə olan məlumata görə, hazırda Azərbaycanın strateji valyuta ehtiyatları 51,7 milyard dollar təşkil edir. Ölkənin strateji valyuta ehtiyatları ilin əvvəli ilə müqayisədə 1,2 faiz artıb. Görünən odur ki, baxmayaraq neçə aydır pandemiya davam edir, strateji valyuta ehtiyatları azalmayıb və yaxud da əvvəlki həcmdə qalmayıb, artıb. Hansı ki, pandemiya ilə əlaqədar bir sıra ölkələrin strateji valyuta ehtiyatları azalır. Azərbaycanda pandemiya şəraitində strateji valyuta ehtiyatlarının artması nə deməkdir?
“Strateji valyuta ehtiyatlarının azalmamasının bir səbəbi də...”
Məsələyə münasibət bildirən iqtisadçı-alim Əli Əlirzayev hazırkı çətin vəziyyətdə Azərbaycanın öz strateji valyuta ehtiyatlarını qoruya və artıra bilməsini bir sıra faktorlarla əlaqələndirdi: “Pandemiya olmasaydı, o zaman Azərbaycanın strateji valyuta ehtiyatları daha çox artardı. Bu onu göstərir ki, neftin qiyməti müəyyən qədər artıb. İstehsal sahələri işləyir, kənd təsərrüfatı sahəsində ümumi vəziyyət yaxşıdır. Ölkənin xidmət sektoru fəaliyyət göstərir. Bircə turizm sektorunda tənəzzül var. Bu da məlum səbəblərlə bağlıdır. Özəl sektorda istehsal və ixrac var. Qeyri-neft sənayesində artım qeydə alınıb və s. Strateji valyuta ehtiyatlarının azalmamasının bir səbəbi də ondan səmərəli şəkildə istifadə etməyimizlə bağlıdır. Məsələ ondadır ki, biz valyuta ehtiyatlarımızdan çox xərcləməmişik. Hesab edirəm ki, bu da vacib məqamdır. Onu də nəzərə almaq lazımdır ki, pandemiya ilə əlaqədar Azərbaycan xarici borclanmaya girməyib. Ümumən ölkədə iqtisadi azalma var, amma digər ölkələrlə müqayisədə bu elə də böyük deyil. Digər tərəfdən, Azərbaycan iqtisadiyyatı özünəməxsus xüsusiyyətlərə malikdir. Son illər ev təsərrüfatlarında fərdi məşğulluq artıb. Regionlarda məşğulluğun səviyyəsi yüksəlib, təsərrüfatda çalışanların sayı artıb. Hesab edirəm ki, bu kimi amillər də strateji valyuta ehtiyatlarının qorunmasına bu və ya digər dərəcədə müsbət təsir edir”.
Belə məlum oldu ki, Azərbaycanda həyata keçirilən düzgün iqtisadi siyasət bu cür müsbət nəticələrin əldə olunmasına gətirib çıxarıb.
Vidadi ORDAHALLI
