19/09/2020 06:35
728 x 90

Karantin rejiminin yumşaldılması iqtisadi fəallığa necə təsir edəcək – ekspert rəyləri…

Vüqar Bayramov: “Ümumilikdə, mərhələli yumşaldılma iqtisadi aktivliyin artırılmasına ünvanlanan addımlardır”

img

Məlum olduğu kimi, yeni növ koronavirus (COVID-19) infeksiyasının geniş yayılmasının qarşısının alınması üzrə 21 iyun 2020-ci il tarixindən etibarən tətbiq olunan sərtləşdirilmiş tədbirlər nəticəsində sanitar-epidemioloji vəziyyətdə stabilləşmə müşahidə edilir.

Preventiv tədbirlər və vətəndaşların mövcud qaydalara əməl etməsi nəticəsində virusa yoluxanların sayında azalmaya nail olunub. Hazırkı sanitar-epidemioloji vəziyyətə uyğun olaraq, sərt karantin rejiminin mövcud olduğu şəhər və rayonlarda, eləcə də ölkə üzrə bəzi yumşalmaların tətbiqinə qərar verilib. Belə ki, 2020-ci il 5 avqust saat 06:00-dan etibarən sərtləşdirilmiş xüsusi karantin zonasına daxil olan şəhər və rayonlarda şəxslərin yaşayış yerini və olduğu yeri SMS icazə, xidməti vəsiqə, icaze.e-gov.az portalı vasitəsilə tərk etmək sistemi ləğv olunur. Bununla yanaşı, Azərbaycan Respublikası Ekologiya və Təbii Sərvətlər Nazirliyi, Fövqəladə Hallar Nazirliyi və Bakı Şəhər İcra Hakimiyyəti tərəfindən karantin rejiminin tələblərinə uyğun müəyyən edilən qaydalar çərçivəsində ölkə üzrə çimərliklərin istifadəsinə icazə verilir.

Maraqlıdır, karantin rejiminin yumşaldılması, ümumilikdə, ölkədə iqtisadi fəallığın artmasında necə rol oynayacaq? Xüsusən də özəl sektorda bu özünü necə göstərəcək? Məsələ ondadır ki, bir müddət əvvəl müəssisələrdə işçilərə verilən icazələrin  sayı yarıbayarı azaldılmışdı. Artıq avqustun 5-dən bu olmayacaq.

  • “İcazələrin ləğvi imkan verəcək ki, müəssisələr tam gücü ilə işləyə bilsin”

Məsələyə münasibət bildirən millət vəkili Vüqar Bayramovun fikrincə, karantin rejiminin yumşaldılması iqtisadi fəallığın artmasına müsbət təsir edəcək: “Mövcud epidemioloji vəziyyətə uyğun olaraq, bütövlükdə, real sektorda fəaliyyətlərin mərhələli şəkildə bərpa edilməsi çox vacibdir. O baxımdan indiki halda mərhələli şəkildə karantin rejiminin yumşaldılması müsbətdir. Xüsusən də icazələrin ləğvi bu baxımdan əhəmiyyətli rol oynayacaq. İcazələrin ləğvi imkan verəcək ki, müəssisələr tam gücü ilə işləyə bilsin. Müəyyən müddətdən sonra xüsusi meyarlar daxilində ictimai iaşə və xidmət sektorunda da fəaliyyətlərin mərhələli şəkildə bərpasının tərəfdarıyam. Hesab edirəm ki, bu çox vacibdir. Mərhələli şəkildə yumşaldılma, nəticə etibarilə, iqtisadi aktivliyin bərpasına imkan verir. Bu isə, bütövlükdə, iqtisadiyyatın yenidən canlanması deməkdir. Təbii ki, iqtisadi aktivlik, ümumdaxili məhsulda artımın bərpa edilməsi müəyyən zaman alacaq. Çünki bu, qlobal və xarici regional faktorlarla birbaşa bağlıdır. Ancaq, ümumilikdə, mərhələli yumşaldılma iqtisadi aktivliyin artırılmasına ünvanlanan addımlardır. Yəni, bir tərəfdən, pandemiyanın lokallaşdırılması və yoluxma sayının azaldılması əsas prioritetdir. Bütün bunlarla yanaşı, iqtisadi aktivliyin bərpa edilməsinə də ehtiyac var. O üzdən, yumşaldılmaya gedilməsi həm də ehtiyacdan doğan bir zərurətdir. Düşünürəm ki, yaxın gələcəkdə sanitar-epidemioloji vəziyyətin qiymətləndirilməsinə uyğun olaraq, ictimai iaşə, turizm və eləcə də xidmət sektorlarında da mərhələli şəkildə yumşaldılmaya gedilməsi məqsədəuyğun olardı”.

Görünən odur ki, karantin qaydalarının mərhələli şəkildə yumşaldılması müsbət iqtisadi gözləntilər vəd edir.

Vidadi ORDAHALLI

Son xəbərlər