2020-ci ilin dövlət büdcəsində dəyişiklik edilməsi haqqında qanun Milli Məclisə daxil olub. Sənədə əsasən, dövlət büdcəsinin gəlirləri 24 milyard 124 milyon manat, xərcləri 27 milyard 492 milyon manat məbləğində olacaq. Dövlət Neft Fondunun dövlət büdcəsinə transferti və dövlət büdcəsinin sair daxilolmaları müvafiq olaraq 850 milyon manat və 30 milyon manat artırılır.
Beləliklə, 2020-ci il dövlət büdcəsinin dürüstləşdirilmiş gəlirləri ÜDM-in 35,3 faizi həcmində olmaqla, 2020-ci ilin təsdiq olunmuş proqnozu ilə müqayisədə 10,5 milyon manat azdır. Qeyd olunan zəruri xərclərin örtülməsi üçün əlavə maliyyə ehtiyatlarının yaradılması layihədə öz əksini tapıb. Bütövlükdə, əlavə tələb olunan 1 milyard 371,5 milyon manat zəruri xərcləri pandemiyanın nəticələrinin aradan qaldırılması, sosial xərclər və digər istiqamətlərdə istifadə olunacaq. Dəyişiklik layihəsində Azərbaycan neftinin bir barrelinin qiyməti 35 dollardan götürülüb. Məlumat üçün qeyd edək ki, bundan əvvəl neftin bir barrelinin qiyməti 55 dollar müəyyən olunub. Layihə Milli Məclisin avqustun 5-də keçiriləcək növbədənkənar iclasında müzakirəyə çıxarılacaq.
Maraqlıdır, büdcədə neftin bir barrelinin qiymətinin 35 dollardan götürülməsinin nə kimi təsirləri olacaq? Sosial layihələri bundan sonra da dayanıqlı saxlamaq mumkün olacaqmı?
“Ola bilsin ki, digər kapital qoyuluşlu sahələrdə müəyyən çətinliklər yaransın”
Sözügedən məsələni baki-xeber.com-a şərh edən iqtisadçı-ekspert Fuad İbrahimovun sözlərinə görə, büdcədə neftin qiymətinin 35 dollara salınması diversifikasiya siyasətinin həyata keçirilməsindən irəli gəlir: “İstənilən halda, neftin qiyməti ucuzlaşaraq 35 dollar dəhlizinə daxil olsa belə, bu, gözlənilən risqləri minimumlaşdırır. Yəni risqlərin qarşısını alır. Ancaq bir şeyi də nəzərə almaq lazımdır ki, bundan sonra neftin qiyməti 30 dollara düşsə belə, Azərbaycan iqtisadiyyatında sosial layihələrin ixtisarı baş verməyəcək. Bununla bağlı hər hansı narahatlıq yoxdur. Ola bilsin ki, digər kapital qoyuluşlu sahələrdə müəyyən çətinliklər yaransın. Burada söhbət iri investisiya tutumlu layihələrdən gedir. Prezident İlham Əliyev çıxışlarında hər zaman xüsusi qeyd edib ki, bu il sosial layihələrdə hər hansı ixtisar olmayacaq. O üzdən, hər hansı sosial layihənin dayandırılmasından söhbət gedə bilməz. O baxımdan büdcədə neftin qiymətinin 35 dollardan götürülməsi təşəbbüsü təqdirəlayiqdir. Risqlərin sığortalanması baxımından bu addımı atmaq doğrudur”.
Ekspertin fikrincə, gözlənilən dəyişikliklə bağlı narahatlığa əsas yoxdur.
Vidadi ORDAHALLI
