14/08/2020 20:32
728 x 90

Fermerlərə aqrar sığorta mexanizmi işə salınır – Azərbaycan fermerlərinin qazancı nə olacaq...

Fuad Sadıqov: “...sığorta müqaviləsində göstərilən bütün risqlərdən sığortalayacaq”

img

Qeyri-neft sektorunun mühüm bir qolu kimi aqrar sahənin inkişafı hazırda Azərbaycan üçün əsas prioritetlərdən birini təşkil edir. Bu xüsusda atılan addımlar artıq aqrar sahənin sığorta və kredit dərdinin də çözülmək üzrə olduğunu göstərir.

Bu sahədə yaşanan problemlərin həll olunması istiqamətində atılan addımlar artıq müsbət nəticəsini göstərdi. Belə ki, artıq fermerlərə aqrar sığorta veriləcək.

  • “Aqrar sığorta fermerlərin və təsərrüfat sahiblərinin məhsullarını və gəlirlərini qoruyacaq”

Aqrar sığortanın fermerlərə nə kimi təsiri və əhəmiyyətinin olacağını öyrənmək məqsədilə Aqrar Sığorta Fondunun idarə heyətinin sədri Fuad Sadıqova müraciət etdik.

O bizimlə söhbətində qeyd etdi ki, aqrar sığorta fermerlərin və təsərrüfat sahiblərinin məhsullarını və gəlirlərini qoruyacaq: “Burada bir məqamı qeyd edim ki, Aqrar Sığorta Fondu kommersiya təşkilatı olmadığından, onun işi mənfəət əldə etmək deyil, fermerlərin məhsullarını və qazanclarını qorumaqdır. Bu da imkan verəcək ki, fermerlər bu sahədə uzun müddət və rahat fəaliyyət göstərə bilsinlər”.

Həmsöhbətimiz onu da əlavə etdi ki, aqrar sığorta üzrə təminat verilən risqlərin tərkibi Nazirlər Kabinetinin 27 dekabr 2019-cu il tarixli qərarı ilə təsdiqlənib. Həmin qərara əsasən, aqrar sığorta fermerləri və təsərrüfat sahiblərini təbii fəlakətlərdən, yəni zəlzələ, torpaq sürüşməsi, qasırğa, fırtına, dolu, eləcə də yanğınlar, bitki xəstəlikləri və zərərvericilərin təsirindən, yoluxucu xəstəlik və zəhərlənmələrdən, vəhşi heyvanların hücumu nəticəsində ölümdən və üçüncü şəxslərin hərəkətlərindən sığortalayır: “Aqrar sığorta xidməti fermerləri sığorta müqaviləsində göstərilən bütün risqlərdən sığortalayacaq. Onu da bildirim ki, aqrar sığortanın əhatə etdiyi bitki və heyvanların siyahısı da Nazirlər Kabinetinin “Aqrar sığorta predmetinin tərkibi”nin təsdiq edilməsi haqqında qərarı ilə təsdiqlənib. Həmin qərara əsasən, bitkiçilik sahəsində buğda, arpa, qarğıdalı, kartof, şəkər çuğunduru, portağal, limon, naringi, çay, tütün, çəltik, üzüm, fındıq, pambıq sığorta olunur. Göründüyü kimi, aqrar sığorta ilkin mərhələdə bütün əsas bitkiləri əhatə edir, bu bitkilər ölkədəki ümumi əkin sahəsinin 84%-ni təşkil edir. Heyvandarlıq sahəsində isə məhsuldarlıq və istehsal göstəricilərinin yüksəldilməsi məqsədilə 1 yaşdan 7 yaşadək südlük inəklər və camışlar aqrar sığortanın əhatə dairəsinə daxildir. Eləcə də akvakulturanın inkişafını stimullaşdırmaq, balıq məhsulları ilə təminatda yerli istehsalın xüsusi çəkisini artırmaq məqsədilə ilkin mərhələdə balıqların sığortası təmin ediləcək”.

Müsahibimizin dediyindən belə aydın oldu ki, fermerlərə aqrar sığortanın verilməsi kənd təsərrüfatının inkişaf etməsinə səbəb olacaq.

Günel CƏLİLOVA 

Son xəbərlər