Bu ilin III rübü ərzində Azərbaycanda avtomobil kreditləri üzrə orta faiz dərəcəsi artıb. Azərbaycan Mərkəzi Bankının yaydığı məlumatda qeyd olunur ki, cari il iyulun 1-nə milli valyutada verilən avtomobil kreditləri üzrə orta faiz dərəcəsi 18%, ABŞ dollarında verilən kreditlər üzrə isə 16% təşkil edib.
Xatırladaq ki, bu il aprelin 1-nə eyni kateqoriyadan olan kreditlər üzrə orta faiz dərəcəsi müvafiq olaraq 17% və 15% səviyyəsində olub. Bu da, öz növbəsində, əvvəlki rübün yekunu ilə müqayisədə 1 faiz bəndi artım olmasını əks etdirir.
“Pandemiya ilə bağlı avtomobil kreditlərinə güzəşt edilmədi, əksinə, kredit faizi yüksəldi”
Avtomobil kredit faizinin artması barədə fikir bildirən iqtisadçı-ekspert Natiq Cəfərli qeyd etdi ki, Azərbaycan Mərkəzi Bankının İdarə Heyətinin 23.04.2020-ci il tarixli qərarı ilə koronavirus pandemiyasına görə bank sektorunda bəzi güzəştlərə icazə verilib. Belə ki, martın 1-dən sentyabrın 30-a qədər biznes və istehlak kreditini ödəyə bilməyən vətəndaşlara cərimə faizi və dəbbə pulu hesablanmayacaq: “Güzəştlər istehlak kreditlərinin digər növlərinə tətbiq edilmir. O cümlədən, avtomobil kreditlərinə də güzəşt şamil edilmir və kredit faizi yüksəlib”.
Həmsöhbətimiz onu da əlavə etdi ki, Azərbaycanda avtomobil krediti 20 faizdir. Dünyanın heç bir yerində belə yüksək səviyyədə kredit faizi yoxdur. Banklar depozit götürüb kredit verməklə işini bitmiş hesab edir.
İqtisadçının sözlərinə görə, pandemiya ilə bağlı iş yerləri qapanıb, vətəndaşların gəlirləri azalıb, amma kredit güzəştləri olmadı, faizlər hesablanmağa davam edir, beləliklə də payız-qış aylarında toksik, problemli kreditlərin həcmi kəskin artacaq. Bank sistemi stresli vəziyyətə düşəcək.
Həmsöhbətimizin fikrindən belə nəticə hasil oldu ki, banklar yenə öz ampluasındadır. Onlar pandemiya dövründə belə öz qazanclarını düşünüb, avtomobil kredit faizini qaldırırlar.
Günel CƏLİLOVA
