“Kapital Bank” məhsulu olan “Birkart” plastik kartda qara mühasibatlıq olduğu iddia edilir. Bu barədə redaksiyamıza daxil olan şikayətdə qeyd olunur. Bildirilir ki, “Kapital Bank” müştərilərinin adına saxta “Birkart” açaraq “çirkli pullar”ını yuyur, ya da bankın əməkdaşları bu yolla özlərinə qazanc əldə edirlər. Belə ki, iddialara görə, sözügedən bank bu əməliyyatları qara mühasibatlığı üçün müştərilərindən gizlin həyata keçirir.
Şikayətdə qeyd olunur: “BirBankda” baxıram, kartlar bölməsində mənə aid olmayan və mən tərəfdən açılmayan bank kartı görünür. Üzərində də əməliyyatlar olunur. Misal, digər kart hesabı artıq özü-özünə necə açılmışdısa, elə də bloklanıb. Açıldığına dair də müraciət etməmişəm, bloklanmasına dair də.
İkinci “Birkart” da belə. Bu gün baxıram ki, başqa bir kart da əlavə olunub. Halbuki, kart sifarişim olmayıb. Hardan çıxır bu kart? Bu hal tək məndə də olmur, ətrafımdakı insanlarda da belə hadisələr olur. Kart hesabı açılır və üzərində əməliyyatlar olunur”.
Məsələ ilə bağlı “Kapital Bank”a rəsmi müraciət ünvanladıq. Lakin müraciətimizə şikayətin həqiqət olub-olmadığına dair cavab verilmədi.
“Ölkədə əməkhaqqı kartları həm milli qanunvericilik, həm də beynəlxalq aləmdə qəbul edilmiş sağlam bank praktikasının tələbləri baxımından misli görünməyən hüquq pozuntusu ilə buraxılır”
Bank sahəsi üzrə ekspert Əkrəm Həsənov bizimlə söhbətində qeyd etdi ki, vətəndaşın xəbəri olmadan onun adına kart açılması düzgün deyil. Bu, qanun pozuntusudur: “Belə bir problemin ola biləcəyi barədə bir neçə il öncə ictimaiyyətə məlumat vermişdim. Ölkədə əməkhaqqı, pensiya, müavinət və təqaüd kartları həm milli qanunvericilik, həm də beynəlxalq aləmdə qəbul edilmiş sağlam bank praktikasının tələbləri baxımından misli görünməyən hüquq pozuntusu ilə buraxılır. Belə ki, Azərbaycan Mərkəzi Bankının “Ödəniş kartlarının emissiyası və istifadə Qaydaları”na əsasən, belə kartlar üzrə hər bir vətəndaşla bank ayrıca bank hesabı müqaviləsi bağlamalı və kart həmin hesaba bağlanmalıdır. Lakin reallıqda müqavilə bağlanmır, kart isə işəgötürənə və yaxud pensiya/müavinət/təqaüd buraxan təşkilata mənsub olan vahid bank hesabına bağlanır. Vətəndaşlara, sadəcə, kartlar paylanır, vəssalam. Nəticədə sözügedən Qaydalarla yanaşı, bir neçə qanunun da tələbləri pozulur”.
Ekspertin dediyindən belə aydın olur ki, vətəndaşın xəbəri olmadan onun adına kart açılırsa, bu hal qanunsuzdur və bunu edən şəxslər məsuliyyətə cəlb olunmalıdırlar.
Günel CƏLİLOVA
