Bu ilin yanvar-iyun aylarında Azərbaycan 45,9 milyon ABŞ dolları dəyərində 25,7 min ton ət idxal edib. Dövlət Gömrük Komitəsinin (DGK) yaydığı məlumatda qeyd olunur ki, 2020-ci ilin yanvar-may aylarında ölkəyə 22,5 min ton ət idxal edilib ki, bunun da dəyəri 40,4 milyon ABŞ dolları olub. Keçən ilin eyni dövründə isə bu idxal 20,3 min tonadək (29,3 milyon dollar dəyərində) olub.
Qeyd edək ki, pandemiya ilə əlaqədar olaraq cari ilin beş ayı ərzində ölkədə toylar keçirilmədiyi üçün şadlıq evləri fəaliyyət göstərmir. Eyni zamanda, iaşə obyektləri də məlum səbəblə bağlı çalışmır. Belə olan halda, ətin idxalının nə səbəbdən artması maraq doğurur?
Firdovsi Fikrətzadə: “Yarım ildə ət idxalında 1,6 min ton artım kəskin bir problem deyil, bu, ümumi bazar trendidir”
Kənd Təsərrüfatı Nazirliyi (KTN) yanında Aqrar Tədqiqatlar Mərkəzinin direktoru Firdovsi Fikrətzadə bildirdi ki, Azərbaycanda il ərzində təqribən 330 min ton əti istehsal olunur. İstehsalın 140 min tona yaxınını mal əti təşkil edir: “Yarım ildə ət idxalında 1,6 min ton artım kəskin bir problem deyil. Bu, ümumi bazar trendidir, idxal yarım illikdə arta, növbəti 6 ayda azala bilər. Burada qeyri-adi heç nə yoxdur”.
Həmsöhbətimiz onu da əlavə etdi ki, ölkəyə həm diri çəkidə, həm də kəsilmiş şəkildə ət idxal olunur: “Ümumilikdə ölkəyə həm diri çəkidə, həm də kəsilmiş formada 12-15 min ton mal əti idxal olunur. Gətirilən diri mal-qara da ət hesab olunur. İl ərzində “Aqrolizinq” Açıq Səhmdar Cəmiyyətinin xətti ilə damazlıq niyyəti ilə 4-5 min baş heyvan gətirilir. Avropadan gələn yüksək məhsuldarlıqlı cinslərdən başqa, Rusiya, MDB ölkələrindən də cins mallar gətirilir”.
Samir Əliyev: “Pandemiyanın yaratdığı vəziyyətlə bağlı qıtlıq yaşanmasın deyə hökumət ərzaq məhsulları və dərman preparatları idxal edən şirkətlərə “yaşıl işıq” yandırdı”
İqtisadçı ekspert Samir Əliyevin sözlərinə görə, pandemiya şəraitinə görə qıtlıq yaranmasın deyə, hökümət aprel ayından ərzaq idxalına üstünlük verməyə başlayıb: “Pandemiyanın yaratdığı vəziyyətlə bağlı qıtlıq yaşanmasın deyə hökumət ərzaq məhsulları və dərman preparatları idxal edən şirkətlərə “yaşıl işıq” yandırdı. Digər şirkətləri isə müxtəlif vasitələrlə məhdudlaşdırdı ki, ölkədən valyuta axını olmasın. Lakin həmin şirkətlərə, xüsusilə də iri holdinqlərə müəyyən tövsiyə və tapşırıqlar verdi ki, zəruri ərzaq ehtiyatı əldə etsinlər. Doğrudur, əvvəlki illərdə də ət idxalında müəyyən artımlar olub. Lakin indiki halda mən hesab edirəm ki, bu artım hökumətin ərzaq ehtiyatı yaratmaqla bağlı həyata keçirdiyi strategiya ilə bağlıdır. Hər bir halda bununla bağlı ilin ikinci yarısından sonra daha dəqiq nəticələr çıxarmaq olar”.
Qeyd edək ki, artdan ölkəyə turist gəlmir, kafe-restoranlar bağlı, şadlıq evlərində toylar ləğv edilib, yas mərasimləri keçirilmir. Bu halda ət istehlakında ciddi düşmə olmalı idi. Ancaq bunun əksini müşahidə edirik.
Günel CƏLİLOVA
