Pərviz Heydərov: “Pandemiya dövründə banklar müştərilərə bir sıra güzəştlər etməlidir”
Pandemiya dövründə vətəndaşların vəziyyətini və bankların mövcud gəlirliliyini nəzərə alan Mərkəzi Bank kommersiya və dövlət banklarına əhaliyə xüsusi güzəşt edilməsini tövsiyə edib. Amma bu tövsiyə bəzi banklar tərəfindən qulaqardına vurulur.
Banklar vətəndaşlara zəng edərək kredit ödənişinin vaxtında ödənilməsini tələb edir. Ödəniş bir neçə gün gecikərsə faiz hesablanır.
Qeyd edək ki, hazırda bir sıra sahələrə güzəşt edilir. Maraqlıdır, bank sektoru vətəndaşlara niyə güzəşt tətbiq etmir?
- “Kommersiya bankı korporativ sosial məsuliyyətə görə pandemiya dövründə öz müştərilərinə dəstək olmalıdır”
Iqtisadçı Pərviz Heydərov bildirdi ki, koronavirusla bağlı yaranmış böhran davam etdikcə dövlətdən və hökumətdən əhalinin sağlamlığı qayğısına qalmaq, habelə iqtisadiyyatı neftin qiymətinin aşağı olmasından, maliyyə və iqtisadi sarıdan daxili nizam-intizamın pozulması və baş verə biləcək xaos, ciddi tənəzzüldən sığortalamaq tədbirləri daha çox güc sərf etməyi tələb edidşk: “Hazırda zərər dəyən sahələrin sayı getdikcə artır. Çünki koronavirus elə bir fəlakətdir ki, həm daxildən, həm xaricdən zərbə vurmaqla yanaşı, müddət artdıqca "immunitet müqaviməti" getdikcə sıfıra enir ki, problemlər də həm şaquli, həm də üfiqi istiqamətdə genişlənməklə daha dərinə işləyir. Söhbət ondan gedir ki, aprel və may aylarında ilk növbədə, birinci dərəcəli sahələrə xüsusi dəstək və yardım göstərildisə, iyun ayı başlayan kimi bunları davam etdirmək lazım gəldiyi zərurəti göründü”.
Həmsöhbətimiz onu da əlavə etdi ki, pandemiya dövründə banklar müştərilərə bir sıra güzəştlər etməlidir. Çünki banklar praktik olaraq gəlir əldə edən kommersiya qurumlarıdır. Onu da nəzərə almaq lazımdır ki, Azərbaycanda kredit faizləri çox yüksəkdir: “Kredit faizləri yüksək olduğuna görə bu, təbii ki, kommersiya banklarına gəlir əldə etməyə imkan yaradır. Ona görə də daha məqsədəuyğun olardı ki, kommersiya bankları tərəfindən əhaliyə bir sıra güzəştlər tətbiq edilsin. Çünki kommersiya bankı da korporativ sosial məsuliyyətə görə pandemiya dövründə öz müştərilərinə dəstək olmalıdır. Banklar öz müştərilərini qorumaqda maraqlı olmalıdırlar”.
Apardığımız araşdırma zamanı bəlli oldu ki, karantinlə bağlı insanlar ödəniş etməkdə çətinlik çəkəcək. Buna görə də bir müddətdən sonra problemli kreditlərin sayı artacaq. Problemli kreditlərin həcminin artmaması üçün banklar istehlak kreditləri ilə bağlı güzəşt tətbiq etməlidir.
Günel CƏLİLOVA
