“Turizm sahəsi bərpa olunmağa başlayana qədər bu sahəyə dəstək göstəriləcək”. Bunu Prezident İlham Əliyev iyunun 30-da Ümumdünya Turizm Təşkilatının Baş katibi Zurab Pololikaşvili ilə keçirilən videokonfrans zamanı deyib.
Dövlət başçısı bildirib ki, turizm pandemiya şəraitində ən çox zərər çəkmiş sahələrdən biridir: “Biz bunu Azərbaycanda da, bütün dünyada da müşahidə edirik. Buna görə təbiidir ki, sizin üzərinizə əlavə yük düşüb. Ona görə ki, əvvələn, pandemiya dövründə turist axını təbii olaraq çox azalıb, lakin postpandemiya dövründə də bu sahənin bərpa olunması, əlbəttə, müəyyən məhdudiyyətlərlə bağlı olacaq. Bildiyiniz kimi, son vaxtlar Azərbaycana gələnlərin sayının xeyli artması müşahidə olunurdu. Keçən il rekord göstərici qeydə alınıb – 3 milyondan çox əcnəbi vətəndaş Azərbaycana səfər edib. Faiz nisbətində desək, turist axını təqribən 15 faiz artıb. Son 4-5 ildə orta illik artım göstəricisinin 10-24 faiz həddində olmasını nəzərə alsaq, deyə bilərik ki, bu sahə çox geniş vüsət alıb. Biz şadıq ki, özəl sektor bu sahəyə fəal sərmayə qoyur, dövlət də dəstək göstərir. Pandemiya dövründə biz bu sahədə işləyən insanlara maddi dəstək göstərmişik, çünki onlar praktiki olaraq işsiz qalıblar. Sahə bərpa olunmağa başlayana qədər bu dəstək göstəriləcək. Odur ki, mühüm məsələlər barədə danışmaq təşəbbüsünə görə sizə təşəkkür edirəm".
“Azərbaycan dövləti, xüsusilə dövlət başçısı ağır pandemiya şəraitinin aradan qaldırılması, Azərbaycanın iqtisadi inkişafının davamlılığının, dinamikliyinin təmin edilməsi...”
Pandemiya dövründə Azərbaycan turizminin vəziyyəti və inkişafı barədə danışan turizm sahəsi üzrə ekspert Elçin Rüstəm bildirdi ki, turizm qeyri-neft sektorunda prioritet istiqamətlərdən biridir və Azərbaycan Prezidentinin rəhbərliyilə həyata keçirilən siyasət qeyri-neft sektorunun inkişafı və iqtisadiyyatın diversifikasiyasını da özündə ehtiva edir: "Bu baxımdan turizm ölkəyə valyuta gətirən sektorlardan biridir. Qeyri-neft sektorunda turizm Azərbaycana çox valyuta gətirən və enerji sektorundan sonra ölkəmizə valyuta gətirən ikinci sektordur. 2019-cu il Azərbaycanda turizmin inkişafı baxımından yaddaqalan illərdən biri olub. Belə ki, ölkəyə ötən il 3 milyondan artıq turist gəlib və bu, ölkəyə gələn turistlərin illik olaraq sayının 15 faiz artması deməkdir. Xaricilər ötən il Azərbaycanda 2 milyard dollara yaxın vəsait xəcləyiblər ki, bu da təbii ki, ölkəyə daxil olan valyutanın həcminə birbaşa təsir göstərir. Biz son illər, xüsusilə də 2015-ci ildən sonra turizm sektorunun daha çox inkişaf etməsini müşahidə edə bilərik. Əvvəlki illərdə formalaşan infrastruktur ölkəyə daha çox turistin gəlməsinə imkan yaradıb, eləcə də vizaların verilməsi sisteminin elektronlaşması, bu istiqamətdə şəffaflığın gücləndirilməsi də Azərbaycana gələn turistlərin sayına birbaşa təsir göstərir ki, bu da ölkəyə daha çox turistin gəlməsinə səbəb olub".
Həmsöhbətimiz onu da vurğuladı ki, Azərbaycan dövləti, xüsusilə dövlət başçısı ağır pandemiya şəraitinin aradan qaldırılması, Azərbaycanın iqtisadi inkişafının davamlılığının, dinamikliyinin təmin edilməsi, ölkə vətəndaşlarının sağlamlığının, güzəranın yaxşılaşdırılması üçün lazım olan bütün addımları atır: “Videokonfrans zamanı dövlət başçısının söylədiyi kimi, son vaxtlar Azərbaycana gələnlərin sayının xeyli artması müşahidə olunurdu. Hətta keçən il rekord göstərici qeydə alınıb – 3 milyondan çox əcnəbi vətəndaş Azərbaycana səfər etmişdi. Faiz nisbəti ilə desək, turist axını təqribən 15 faiz artıb. Ümumilikdə, son 4-5 ildə orta illik artım göstəricisinin 10-24 faiz həddində olmasını nəzərə alsaq, deyə bilərik ki, bu sahə çox geniş vüsət alıb. Həmçinin, ölkə Prezidentinin də qeyd etdiyi kimi, biz şadıq ki, özəl sektor bu sahəyə fəal sərmayə qoyur, dövlət də dəstək göstərir. Pandemiya dövründə də bu sahədə işləyən insanlara maddi dəstək göstərilib, çünki onlar praktiki olaraq işsiz qalıblar. Sahə bərpa olunmağa başlayana qədər bu dəstək göstəriləcək. Dövlət başçısı özü də çıxışında bunu bir daha dilə gətirdi”.
Ekspertin sözlərinə görə, son 4-5 ay ərzində dünyada və onun bir parçası olan ölkəmizdə yaşanan ağır pandemiya şəraiti bütün sahələrə mənfi təsirini göstərdiyi kimi, turzim sektoruna da öz mənfi təsirlərini göstərməkdədir. Burada məlum səbəblərdən bir geriləmə, durğunluq yaşanmaqdadır. Bununla belə, Azərbaycan dövlətinin, xüsusilə dövlət başçısının iradəli, qətiyyətli, cəsarətli addımları nəticəsində bu sekrorda da yaranmış çətin vəziyyət yaxın zamanlarda aradan qaldırılacaq. Eyni zamanda, qoyulan şərtlərə və tələblərə nə qədər tez və vaxtında əməl etsək, həm koronavirus bəlasından xilas olacağıq, həm də dövlətin yükünü azaltmaqla, dövlətin inkişafına təkan verməklə, bütün sahələrdə, o cümlədən, turizm sahəsində yenidən canlanmaya nail ola biləcəyik.
Günel CƏLİLOVA
