12/07/2020 07:04
728 x 90

Mikayıl Cabbarov pandemiyanın Azərbaycan iqtisadiyyatına təsirlərindən danışdı

“Pandemiyanın iqtisadiyyatımızın strukturunda mənfi təsiri minimal səviyyədədir”

img

Pandemiya dövründə ölkəmizin iqtisadiyyatı çətinliklə üzləşsə də, iqtisadiyyatımızın strukturunda mənfi təsir minimal səviyyədədir. Trend-in məlumatına görə, bunu bu gün keçirilən mətbuat konfransında İqtisadiyyat naziri Mikayıl Cabbarov bildirib.

Nazir qeyd edib ki, biznes mühitin yaxşılaşması istiqamətində işlər görülür: "2019-cu il yanvarın birindən əmək müqavilələri ilə bağlı da islahatlar aparıldı. 2019-cu il yanvarın 1-də 539 min 522 əmək müqaviləsi vardısa, 2020-ci il 26 iyunda bu rəqəm 751 min 705 olub. Bu da o deməkdir ki, 18 ay ərzində 210 min əmək müqaviləsi artıb".

M. Cabbarov bildirib ki, İqtisadiyyatımızın əsas oyuncularına mənfi təsir minimumal səviyyədədir. Ölkədə biznes mühiti son illər yaxşılaşdırılır, biznes mühitə müxtəlif müdaxilələrin azalması müşahidə edilir. İlin sonuna qədər ölkə iqtisadiyyatında balanslaşdırılma baş verməsinə inanırıq: "Sahibkarların fəaliyyətinin təşviq edilməsi davam etdiriləcək. Ölkənin sənaye parklarına bu gün böyük maraq hiss etdirik. İnvestisiya layihələrinə maraq qalıb, düşünürəm ki, yaxın vaxtlarda Sumqayıt Kimya Sənaye Parkında özəl sektor tərifəndən layihələrin həyata keçirilməsini müşahidə edəcəyik".

Nazir qeyd edib ki, pandemiyanın Azərbaycan iqtisadiyyata nə qədər zərər vurması barədə danışmaq hələ tezdir: "Hazırda bu proses davam edir. Hesablamalar aparılır".

M.Cabbarov deyib ki, pandemiya dövründə ümumilikdə idxalın həcminin azalması 5 faiz ətrafında müşahidə edilir. Onun sözlərinə görə, ixrac əməliyyatında da azalma müşahidə edilir: "Dünya bazarında neftin qiymətində azalmanın olması ixraca da təsir edib. Qeyd edim ki, bizim ixrac etdiyimiz məhsulların dəyəri idxalın dəyərini üstələyir".

Nazir qeyd edib ki, əmlak və kapital amnistiyası ilə bağlı məsələ İşçi Qrup səviyyəsində müzakirə edilir. Onun sözlərinə görə, bu məsələyə sahibkarlar tərəfindən maraq göstərilir: "Hazırda bununla bağlı beynəlxalq təcrübə nəzərdən keçirilir. Proses başa çatandan sonra nəticə barədə ictimaiyyətə məlumat veriləcək".

İqtisadiyyat naziri M.Cabbarov dünya enerji və fond bazarlarında durğunluq, koronavirus pandemiyası səbəbindən tətbiq olunan məhdudiyyətlərin və yaranmış yeni çağırışların milli iqtisadiyyata təsirləri barədə də danışıb. Nazir bildirib ki, pandemiyanın mənfi təsirləri və neftin qiymətinin qeyri-sabitliyi nəticəsində iqtisadi fəallıq azalıb, iqtisadi tarazlıq pozulub, tətbiq edilmiş məhdudiyyətlər istehsal-emal-istehlak zəncirində qırılmalara səbəb olub. Bununla belə, iqtisadiyyatda müşahidə olunan durğunluğa baxmayaraq, milli iqtisadiyyatı tənəzzülə apara biləcək vəziyyət yaranmayıb.

Nazir qeyd edib ki, hazırda dövlət başçısı cənab İlham Əliyevin təşəbbüsü və tapşırıqları əsasında hökumət milli iqtisadiyyata zərərləri minimallaşdırmaq üçün tədbirlər həyata keçirir. Həyata keçirilən proqramlar vasitəsilə dövlət biznesə yaranmış şəraitdən daha az itkilərlə çıxmağa kömək etməyə çalışır.

Nazir Mikayıl Cabbarov bildirib ki, yeni şərtlər əsasında yaşamağa və işləməyə vərdiş etməliyik. Nazir pandemiyanın mənfi təsirlərinin uzun müddət çəkə biləcəyini istisna etməyib: “İstər cəmiyyət, istər sahibkarlar yaranmış yeni tələblərə uyğunlaşmalıdır. Pandemiyanın nə zaman bitəcəyi məlum deyil, ona görə də, sahibkarlar yeni şərtlər, sanitar-karantin və sosial-davranış qaydaları əsasında işləməyə öyrənməlidir. Ticarət və xidmət obyektləri yeni qaydalara nə qədər tez vərdiş etsələr, bu onların biznesləri üçün daha vacibdir”.

M.Cabbarov qeyd edib ki, sahibkarların qaydalara riayət etməsi vacibdir: “Unutmamalıyıq ki, biz hamımız bir məkandayıq və gələcək həyat tərzimiz daha çox davranışlarımızdan asılı olacaq”.

Nazir əmin olduğunu bildirib ki, birgə səylərlə biznes tədricən iqtisadi itkiləri bərpa edəcək.

Son xəbərlər