10/07/2020 22:47
728 x 90

Pandemiyadan ən az zərər çəkmiş Azərbaycan barədə yeni proqnoz – gələn il 3 faiz iqtisadi artım...

Natiq Cəfərli: “Gələn il iqtisadiyyatda qeydə alınacaq artım 2020-ci ildə itirilənlərin geri qayıtması hesabına olacaq”

img

Tez-tez mediada koronavirus pandemiyasının qlobal iqtisadiyyata ağır zərbə vurması, onun inkişafını zəiflətməklə, bir neçə il geriyə salması barədə xəbərlərlə rastlaşırıq. Pandemiyanın dünya iqtisadiyyatına, eləcə də ölkəmizə təsiri barədə məlumatlar yer alır. Araşdırmalar bir çox ölkəyə nisbətdə Azərbaycanın iqtisadi itkilərinin daha az olacağını göstərir. Xüsusən də özəl sektora dövlət dəstəyi nəticəsində Azərbaycanın itkilərinin daha az olması, gələn il isə dinamik iqtisadi artımın olması gözlənir.

“Moody’s” növbəti ildə ölkəmizdə ən azı 3 faizlik iqtisadi artım proqnozlaşdırır. Burada özəl sektora dəstək yenə mühüm əhəmiyyət kəsb edir. Bu arada özəl sektor üçün hökumət yeni mühüm addımlar atır. Məsələn, pandemiya dövründə müvəqqəti vergi rejiminin qəbulu nəticəsində verginin "0" dərəcəsində tutulmasının əhatə dairəsi genişləndirilir. Artıq müvəqqəti vergi rejiminin əhatə dairəsi bir sıra yeni sahələrdə müəyyənləşdirilib. Məsələn, əmlak və torpaq vergisindən azadolmalar və mənfəət vergisindən güzəştlər müəyyənləşdirilib, sadələşdirilmiş sistem üzrə verginin azaldılması təmin edilib. Bütövlükdə, sosial sığorta haqları ilə bağlı differensasiyalar həyata keçirilib.

  • “Bir çox beynəlxalq agentliyin, o cümlədən, “Moody's”un qarşıdakı illər üçün hazırladığı hesabatlar 2020-ci ilin iqtisadi göstəriciləri əsasında tərtib olunur”

Beynəlxalq kredit reytinqi təşkilatı “Moody's”un gələn il Azərbaycan iqtisadiyyatında 3 faizlik artımın olacağı barədə proqnozuna dair  fikir bildirən Natiq Cəfərli “Bakı-Xəbər”ə açıqlamasında qeyd etdi ki, bir çox beynəlxalq agentliyin, o cümlədən, “Moody's”un qarşıdakı illər üçün hazırladığı hesabatlar 2020-ci ilin iqtisadi göstəriciləri əsasında tərtib olunur: “Məlumdur ki, hazırda bütün dünya iqtisadiyyatında zəifləmə müşahidə olunur. Təqribən ilin sonuna kimi 3 faiz civarında iqtisadiyyatda zəifləmə müşahidə olunacaq. Gələn il isə iqtisadiyyatda artım olacaq. Bu artım 2020-ci ildə itirilənlərin geri qayıtması hesabına olacaq. Onu da bildirim ki, beynəlxalq təşkilat neftin qiymətini də nəzərə alıb, onun  əsasında iqtisadiyyatda artımın olacağını hesablayıb. Yəni gələn il neftin satış qiyməti 45-50 dollar arasında olarsa, o zaman iqtisadiyyatda artım ola bilər”.

Sonda qeyd edək ki, əksər beynəlxalq təşkilat və maliyyə qurumu pandemiya dövrü olmağına baxmayaraq, cari və gələn il üçün Azərbaycan iqtisadiyyatında artımın olacağını öz hesabatlarında bildiriblər.

Günel CƏLİLOVA

Son xəbərlər