11/07/2020 06:32
728 x 90

Bankların qabağı koronavirus üçün ən risqli yerlərə çevrilməyə başlayır - onlayn növbəlik tətbiq olunsa…

Əkrəm Həsənov: “Banklarda onlayn növbəliyi təmin etmək üçün müəyyən texniki təminat lazımdır”

img

Son aylar ölkə ərazisində xüsusi karantin rejimi ilə bağlı bir sıra xidmət sahələrində növbələr yaranıb. İnsan kütləsinin qapalı məkanlarda toplanmasının qarşısını almaq məqsədilə müştərilər mərkəzlərə növbəli şəkildə buraxılır. Ən çox növbələrin olduğu xidmət sahələrindən biri də kommersiya banklarıdır.

Danılmaz faktdır ki, sərt karantin rejimi tətbiq olunmazdan əvvəl ən çox sıxlığın müşahidə edildiyi yerlərdən biri də bankların qarşısı idi. Bankların qarşısında növbə gözləyən insanlar nə maska taxır, nə də sosial məsafəni gözləyirdilər. Sosial məsafə və maska taxılmamasının nəticəsində son günlər koronavirusa yoluxanların sayı günü-gündən artır. Bu səbəbdən də banklarda onlayn növbənin tətbiq olunması təklif olunur.

  • ...o zaman nisbətən bu istiqamətdə mövcud olan problemlər aradan qalxar”

Bank sahəsi üzrə ekspert Əkrəm Həsənov bildirdi ki, banklarda onlayn növbəliyi təmin etmək üçün müəyyən texniki təminat lazımdır:  “Bunun reallaşması üçün müəyyən proqramlar həyata keçirilməlidir. Ancaq bizim bank sektorunun onlayn növbəliliyi təmin etmək üçün xüsusi proqramları yoxdur, bu günədək o sistemlə işləməyiblər. “ASAN xidmət”lə əməkdaşlıq nəticəsində o proqramları hökumət hazır alaraq banklara ötürə bilər. Burada böyük problem yoxdur, sadəcə, problem ondadır ki, hətta “ASAN xidmət”də belə müəyyən qədər resurs cəlb edilməsinə, növbəliyin təminatında kömək olunmasına baxmayaraq, sıxlıq olur. Çünki bəzi insanlar vaxtından əvvəl gedirlər. İnsanlarımız bu məsələdə daha diqqətli olmalıdırlar. Bu, bir az da mental məsələdir, cəmiyyətin davranış məsələsidir. Amma yenə də mümkün bütün imkanlardan istifadə edərək, növbəlik prinsipini də təmin etmək olar. Bunu təmin etmək elə də çətin deyil, İT sahəsidir. Lakin proqram təminatının yaradılmasının nə qədər vaxt alacağını bilmirəm. Bankların xidmətinə tələbat nisbətən daha çox olur”.

Həmsöhbətimiz onu da əlavə etdi ki, pandemiyanın nə vaxt bitəcəyi bəlli deyil. Ola bilər ki, ilin sonunadək, yaxud bir il bundan sonrayadək davam etsin. Ona görə də prosesə artıq start verilməlidir. Qısamüddətli dövrdə problemin həlli ancaq o zaman mümkün olar ki, banklarda vətəndaşları onlayn növbəlik prinsipi ilə qəbul etsinlər, bəlkə o zaman nisbətən bu istiqamətdə mövcud olan problemlər aradan qalxar.

Günel CƏLİLOVA 

Son xəbərlər