Koronavirus pandemiyasının zərər vurduğu sahələrdən biri də daşınmaz əmlak bazarıdır. İstər mənzil, istərsə də torpaq satışında durğunluq müşahidə olunur. Araşdırmalara görə, son zamanlar tikinti materiallarının qiymətində artım baş verib.
Qiymət artımı əsasən daşlarda müşahidə olunur. Yəni 45-50 qəpiyə satılan daş 60 qəpiyə, 30 qəpiyə satılan kərpiclər isə 37-40 qəpiyə təklif olunur. Bundan əlavə, taxta, dəmir və digər materialların da qiymətində kəskin bahalaşma var. Bahalaşma pərakəndə satışla yanaşı, tikinti bazarlarında da müşahidə olunmaqdadır. Məlumdur ki, Bakı şəhərində ən böyük tikinti bazarı Dərnəgül tikinti bazarı sayılır. Qiymət artımı ən çox elə adıçəkilən bazarda baş verib.
Onu da bildirək ki, pandemiya ilə bağlı bəzi sahələrdə tikinti işi müvəqqəti olaraq dayandırılıb. Maraqlıdır, tikinti sektorunda aktiv iş olmadığı halda, tikinti materiallarının qiymətinin bahalaşmasının səbəbi nədir?
“Tikinti məhsullarının gətirilməsinin maya dəyəri yüksək olduğu üçün sahibkarlar da onun satışına əlavə məbləğ artırmalı olurlar”
İqtisadçı-ekspert Rəşəd Həsənov bildirdi ki, tikinti sektorunda qiymət artımının müxtəlif səbəbləri var: “İlk olaraq bildirim ki, tikinti materiallarının çoxu xaricdən Azərbaycana idxal olunur. Hazırda karqo ilə bağlı bahalaşma var. Məhsulların gətirilməsinin maya dəyəri yüksək olduğu üçün sahibkarlar da onun satışına əlavə məbləğ artırmalı olurlar. Digər səbəb isə pandemiya ilə bağlıdır. Məlumdur ki, may ayından etibarən tikintilərdə iş dayanmışdı. Karantin yumşaldıldıqdan sonra tikintilərdə tələbat olduğuna görə bahalaşma da ola bilər. Sahibkarlıq subyektləri üçün bu səbəb də qiymət artımına şərait yarada bilər”.
Günel CƏLİLOVA
