Xəbər verildiyi kimi, Prezident İlham Əliyevlə Dünya Bankının təşəbbüsü ilə bankın Avropa və Mərkəzi Asiya regionu üzrə yeni təyin olunan vitse-prezidenti xanım Anna Byerde, Cənubi Qafqaz üzrə regional direktoru Sebastian Molineus və bankın digər nümayəndələri arasında videokonfrans keçirilib.
Xatırladaq ki, bir müddət əvvəl Prezident İlham Əliyevin daha bir maliyyə nəhəngi olan Asiya İnkişaf Bankının təşəbbüsü ilə bankın prezidenti Masatsuqu Asakava, vitse-prezidenti Şiksin Çen və bankın rəhbərliyinin digər nümayəndələri ilə də videokonfrans formatında görüşü keçirilmişdi. Hər iki görüşdə müzakirə olunan mövzuların mahiyyətindən hiss edilir ki, əllərində kifayət qədər maliyyə cəmləşən beynəlxalq qurumlar Azərbaycanla, hətta pandemiya dönəmində belə, əməkdaşlıqda maraqlıdır. Belə marağın səbəbini nə ilə izah etmək olar?
İqtisadçı Elşən Əliyev “Bakı-Xəbər”ə açıqlamasında bildirdi ki, hər iki maliyyə nəhənginin ölkəmizlə əməkdaşlıq marağı yalnız indiki çətin dönəmi əhatə etmir:“Azərbaycanın iqtisadi tərəfdaş kimi etibarlılığı barədə dünyada yekdil rəy formalaşıb. Biz bunun ilkin simptomlarını pandemiya dönəmində də gördük. Bir çox aparıcı qurumların hesabatlarında bu məqam xüsusilə qeyd edilir. Biz heç bir qurumdan dəstək almadan mübarizə işlərini apardıq və buna paralel olaraq, iqtisadiyyatın da inkişafına müəyyən töhfələr vermişik. 2020-ci il Dünya Bankının qiymətləndirmə reytinqinə görə biz ilk 20-likdə qərar tutmuşuq. Bunu dünyanın bütün nüfuzlu maliyyə qurumları bilir. Prezidentin son görüş keçirdiyi Dünya Bankı və Asiya İnkişaf Bankı xüsusilə belə nüanslara ciddi fikir verir. Bu səbəbdən də belə ciddi maliyyə qurumları bizimlə əməkdaşlıq etməyi özləri üçün daha prioritet sayırlar. Asiya İnkişaf Bankının və Dünya Bankının Azərbaycanla bağlı layihələri əvvəl də olub. Ölkə başçısı hər iki görüşdə bu məsələyə detallı toxunub. Həmin qurumlarla əməkdaşlıq bizim üçün də çox önəmlidir. Onlar bizim ölkədə müxtəlif profilləri əhatə edən layihələrə dəstək veriblər. Biz Cənubi Qafqazın ən inkişaf etmiş ölkəsiyik. Biz neft ölkəsi olsaq da, qeyri-neft sektorunun inkişafında maraqlı olduğumuz üçün onların ölkəmizlə əməkdaşlığı nəzərdən qaça bilməzdi. Ölkə başçısı ilə videkonfrans formatında keçirilən hər iki görüş zamanı da qurumlar ölkəmizə yeni investisiya yatırımları etməyi planladıqlarını bildiriblər. Onların gələcək prioritetləri sırasında kənd təssərrüfatı və təhsil sahəsi də olacaq. Belə banklarla əməkdaşlıq həm də ona görə əhəmiyyətlidir ki, buradakı ekspertlərin də əməyindən istifadə olunacaq. Bu da yeni və gəlirli iş yerlərinin açılması anlamına gəlir.
Dünya Bankı maliyyə resurslarının bölgüsünü təmin edən və qlobal iqtisadi inkişaf məqsədlərinə xidmət edən bir təşkilatdır. Bu qurumun qarşısına qoyduğu əsas məqsədlərdən ən başlıcası ölkələrdə sabit və davamlı inkişafa nail olmaq, yoxsulluğun səviyyəsini minumuma endirməkdir. Dünyanın müxtəlif ölkələrində olduğu kimi, Azərbaycanda da iqtisadiyyatın və bir çox sosial-mədəni sahələrin inkişafında bu təşkilatın əvəzsiz rolu olub. Dünya Bankı ilə ölkəmiz artıq 28 ildir əməkdaşlıq edir. Bu qurumla ölkənin iqtisadi inkişafı üçün investisiya axınına nail olmaq, dövlətin institusional imkanlarının artırılması, neft ehtiyatlarının səmərəli istifadə edilməsi və digər iqtisadi aspektlər baxımından əməkdaşlıq edilməkdədir. Hər iki bankla əməkdaşlıq çərçivəsində Azərbaycan iqtisadiyyatı 3 dəfə artıb, bu dönəm ərzində makroiqtisadi sabitlik qorunub. Məhz bu amillər bizi əməkdaşlıq üçün cəlbedici edir”.
Məhəmmədəli QƏRİBLİ
