“Gələcək üçün bizim nəzərə aldığımız iki əsas məsələ şaxələndirməyə əsaslanan iqtisadiyyatın davamlı inkişafına nail olmaqdır. İkincisi isə, iqtisadiyyatın artımı daha çox iş yerləri ilə müşayiət olunmalıdır”. Bunu Prezident İlham Əliyev Dünya Bankının təşəbbüsü ilə bankın Avropa və Mərkəzi Asiya regionu üzrə yeni təyin olunan vitse-prezidenti xanım Anna Byerde, Cənubi Qafqaz üzrə regional direktoru Sebastian Molineus və bankın digər nümayəndələri ilə keçirilən videokonfrans zamanı deyib.
Ölkə başçısının sözlərinə görə, biz qeyri-enerji sektoruna investisiya yatırılmasında maraqlıyıq: “Hökumətin, administrasiyamın və müvafiq nazirliklərin üzvlərindən ibarət xüsusi komissiya yaradıldı. Biz xüsusilə geridə qaldığımız sahələrə diqqət yetirirdik. Biz qısa müddət ərzində çox əsaslı irəliləyişə nail ola bildik. Əlbəttə, bu, ölkədəki biznes mühitini yaxşılaşdırır, daha çox investisiyalardan faydalanmağa imkan verir. Təbii ki, biz qeyri-enerji sektoruna investisiya yatırılmasında maraqlıyıq”.
Prezident onu da qeyd edib ki, bizim üçün hazırda indiki pandemiya dövründə iki əsas prioritet var: “Çünki biz ilə yaxşı iqtisadi artım göstəriciləri, yaxşı formada olan bütün iqtisadi parametrlərlə birlikdə çox ümidverici başlanğıc etdik. Lakin bu ilin 5 ayı göstərir ki, bizim iqtisadiyyatımız 1,7 faiz azalıb. Bu, çox deyil. Lakin bu, azalmadır. Amma ümidverici fakt ondan ibarətdir ki, bizdə kənd təsərrüfatında artım qeydə alınıb – 3 faizdən çox. Qeyri-enerji sənayesində artım 14 faiz təşkil edib. Ona görə də gələcək üçün bizim nəzərə aldığımız iki əsas məsələ şaxələndirməyə əsaslanan iqtisadiyyatın davamlı inkişafına nail olmaqdır. İkincisi isə, iqtisadiyyatın artımı daha çox iş yerləri ilə müşayiət olunmalıdır”.
Prezidentin sadaladığı istiqamətlər ölkənin sosial-iqisadi inkişafı baxımından çox vacibdir. Maraqlıdır, bəs ekspertlər bunu necə dəyərləndirirlər?
“Bu strategiya elə qurulmalıdır ki, biz ölkə iqtisadiyyatını inkişaf etdirməklə daxili tələbatımızı ödəyə bilək”
Məsələyə münasibət bildirən iqtisadçı-alim Əli Əlirzayev Prezidentin sadaladığı sahələrin ölkənin gələcək inkişafı üçün vacib əhəmiyyət kəsb etdiyini bildirdi: “Davamlı inkişafı təmin etmək üçün iqtisadi artım lazımdır. İqtisadi artımı da davamlı inkişaf təmin edir. Bütün bunlar bir-birilə bağlı olan məsələlərdir. Bunun əsas iki istiqamətini Prezident deyib. Birincisi, iqtisadiyyatı şaxələndirmək lazımdır. Şaxələndirmə vasitədir, puldur. Biz bu minvalla ölkə iqtisadiyyatının artımını təmin edirik. Yəni bu sahədə sistemli siyasət həyata keçirilməlidir. Elə sahələr var ki, onlar ancaq ölkənin daxili potensialından asılıdır. Ona görə də bir-birilə bağlı olan sahələri inkişaf etdirmək lazımdır. Bu zaman daha çox iş yeri açmaq mümkün olacaq. Kənd təsərrüfatı, emal sənayesi şaxələnməlidir. Biz mümkün olan qədər çalışmalıyıq ki, neftdən asılılıq azalsın. Şaxələnmə strategiyası elə qurulmalıdır ki, biz ölkə iqtisadiyyatını inkişaf etdirməklə daxili tələbatımızı ödəyə bilək. Ona görə də iqtisadiyyatın şaxələndirilməsi vacib məsələdir. Azərbaycanda iqtisadiyyatın şaxələnməsi üçün rezerv ehtiyatlar, istiqamətlər var. İqtisadiyyatın şaxələnməsi sayəsində ölkədə məşğulluq yüksək səviyyədə təmin ediləcək. Bu olmadan iqtisadi artımı təmin etmək mümkün deyil. İqtisadi artımın strukturu onun şaxələnməsindən və effektivliyindən asılıdır. Ona görə də bütün bunlar bir-birilə sıx əlaqədədir”.
Vidadi ORDAHALLI
