“Ən çox artım qeyri-neft sənayesində və aqrar sektorda gözlənir”
Azərbaycanda həyata keçirilən sistemli islahatlar iqtisadiyyatın müxtəlif sahələrinin inkişafına öz təsirini göstərir. Xüsusən də qeyri-neft sektorunun inkişaf etdirilməsi ilə bağlı qəti addımlar atılır. Bunu bir sıra beynəlxalq qurumlar da təsdiq edirlər.
Bu arada Beynəlxalq Valyuta Fondunun (BVF) Azərbaycandakı missiyasının rəhbəri Məhəmməd Əl-Korşi mətbuata açıqlamasında bildirib ki, Azərbaycanın 2023-cü ilədək qeyri-neft sektorunun artım tempi tədricən iki faizdən başlayaraq üç-dörd faizədək artacaq.
Missiya rəhbəri nəqliyyat, turizm, eləcə də kommunikasiya və telekommunikasiya kimi qeyri-neft sektorlarının əhəmiyyətli artım göstərdiyini, lakin tikinti sektorunda dövlət investisiyalarında yavaşlamanın təsirinin hələ də hiss olunduğunu qeyd edib.
Əl-Korşi iqtisadiyyatın qeyri-neft sektorunun daha sürətli böyüməsi üçün struktur islahatlarının əhəmiyyətini vurğulayıb. Onun sözlərinə görə, bu tədbirlər qeyri-neft sektoruna xarici sərmayələrin cəlb edilməsinə yönəlmiş genişmiqyaslı islahatların intensivləşdirilməsinə, səhiyyə və təhsilə investisiyalar vasitəsilə insan kapitalının gələcək inkişafına istiqamətlənməlidir: “Dünya Ticarət Təşkilatına qoşulma Azərbaycanın qeyri-neft ixracının artmasına kömək edə bilər”.
BVF-nin Azərbaycanda prioritetləri barədə danışan missiyanın rəhbəri Fondun makroiqtisadi siyasətin əsas sahələrində texniki yardım göstərdiyini vurğulayıb: “Bu işlər pul, maliyyə siyasəti, valyuta məzənnələri, bank nəzarəti və milli gəlirin mühasibat uçotu, maliyyə və pul statistikası üzrə təkliflər və tövsiyələrdir”.
Görünən odur ki, BVF Azərbaycanın qeyri-neft sektorunda artımları real hesab edir. O üzdən, bu yöndə proqnozları ciddi əsaslara söykənir.
Maraqlıdır, bəs ekspertlər sözügedən proqnozu necə dəyərləndirirlər?
Məsələyə münasibət bildirən iqtisad elmləri doktoru Fikrət Yusifovun sözlərinə görə, BVF-nin proqnozu Azərbaycan iqtisadiyyatının inkişaf sürətini təmin edəcək islahatlara söykənir: “BVF həyata keçirilən islahatların reallaşma səviyyəsini qiymətləndirərək belə proqnoz verib. Hesab edirəm ki, BVF bununla bağlı tamamilə haqlıdır. Məsələ ondadır ki, BVF-nin Azərbaycan iqtisadiyyatının qeyri-neft sektoru ilə bağlı verdiyi proqnoz gözlənildiyindən də yüksək olacaq. Onlar bu rəqəmləri səsləndirərkən bir qədər ehtiyatla yanaşırlar. Ancaq reallıq onu göstərir ki, biz artıq 2018-ci ilin 9 ayında qeyri-neft sektorunun bir sıra aparıcı sahələrində çox yaxşı nəticələr əldə etmişik. Bütün bunların hamısı da aparılan islahatların məntiqi nəticəsidir. Ona görə də hesab edirəm ki, 2019-cu ildə və ondan sonrakı illərdə qeyri-neft sektorunda artım davam edəcək. Yəni qarşıdakı iki-üç il ərzində daha yaxşı göstəricilər əldə edəcəyik. O üzdən, BVF-nin verdiyi proqnozlar Azərbaycanda aparılan islahatlara və əldə olunan nəticələrə tam uyğundur. Qeyri-neft sektorunda ən çox artım qeyri-neft sənayesində və aqrar sektorda gözlənir. Məxsusi olaraq tranzit yükdaşımalarda da çox ciddi artımlar gözlənir. Çünki Azərbaycan regionda ən böyük tranzit yükdaşımalar məkanına çevrilir. Bu baxımdan iqtisadi artımın yüksələcəyi ilə bağlı gözləntilər böyükdür”.
Vidadi ORDAHALLI
