“Bu qanunun imzalanmasını bir ziyalı, tarixçi-alim kimi yüksək dəyərləndirirəm”
Hər birimizin əbədi and yeri olan müqəddəs üçrəngli bayrağımız respublikamızın müstəqillik simvollarından biri olaraq, dünyanın hansı nöqtəsində yaşamasından asılı olmayaraq, hər bir azərbaycanlının qürur, fəxr ünvanıdır. Harada üçrəngli bayrağımız dalğalanırsa, həmin məkanda bir Azərbaycan dünyası canlanır.
“Prezident İlham Əliyev tərəfindən “Azərbaycan Respublikası Dövlət Bayrağının təsvirinin təsdiq edilməsi haqqında” Konstitusiya Qanununun imzalanması həqiqətən də böyük hadisədir. Bilirsiniz ki, bəzi insanlar dövlət atributlarının dəyişdirilməsi və s. bağlı xoşagəlməz fikirlər səsləndirirdilər. Bu fikirlər də, istər-istəməz, ölkə ictimaiyyətində müzakirələrə səbəb olurdu. Bu qanun üçrəngli bayrağımızın Vətənimizin müstəqilliyinin əbədi simvollarından biri kimi bir daha təsdiqlənməsinə səbəb olmaqla yanaşı, həm də lazımsız söz-söhbətlərə, əsassız müzakirələrə birdəfəlik son qoydu. 100 il bundan əvvəl qəbul edilən və bu gün də dövlətçiliyimizin simvollarından birinə çevrilən bayrağımıza dövlət başçısının imzaladığı qanunla əbədi status verilməsi təqdirəlayiqdir. Sevindirici haldır ki, Prezident İlham Əliyev üçrəngli bayrağımızla bağlı qanun imzalayıb və bu qanun da üçrəngli bayrağımıza aid bütün məsələləri tənzimləyəcək. Bu qanunun imzalanması bayrağımızla əlaqədar bütün məsələlərin xeyrinədir. Bu qanunun imzalanmasını bir ziyalı, tarixçi-alim kimi yüksək dəyərləndirirəm”. Bunu “Bakı-Xəbər”ə Prezident İlham Əliyev tərəfindən “Azərbaycan Respublikası Dövlət Bayrağının təsvirinin təsdiq edilməsi haqqında” Konstitusiya Qanununun imzalanmasına münasibət bildirərkən tarix elmləri doktoru, professor Anar İsgəndərli deyib.
Məlum olduğu kimi, sözügedən qanunla “Azərbaycan Respublikası Dövlət Bayrağının təsviri” təsdiq edilib.
Konstitusiya Qanununa əsasən, Azərbaycan Respublikasının Dövlət Bayrağı eni bərabər olan üç üfüqi zolaqdan ibarət düzbucaqlı şəklindədir. Yuxarı zolaq mavi rəngdə, orta zolaq qırmızı rəngdə, aşağı zolaq yaşıl rəngdədir. Düzbucaqlının eninin uzunluğuna nisbəti 1:2-dir.
Qırmızı zolağın ortasında aypara və səkkizguşəli ulduz təsviri var. Aypara və ulduz ağ rəngdədir. Ayparanın ucları ondan sağda yerləşən ulduza istiqamətlənib.
İradə SARIYEVA
