“Adına reket jurnalistika dediyimiz, əslində isə jurnalistika ilə heç bir formal və prinsipial əlaqəsi olmayan fəaliyyətlər ölkəmizin milli və informasiya təhlükəsizliyini qorxulu şəkildə təhdid edir, vətəndaş həmrəyliyini pozur, əsl jurnalistikanı gözdən salır, neçə-neçə dəyərli jurnalistin adına və əziz xatirəsinə hörmətsizlik edir”.
Bu fikirləri SİA-ya açıqlamasında “Bakı-Xəbər” qəzetinin baş redaktoru Aydın Quliyev deyib.
O bildirib ki, Dövlət Təhlükəsizlik Xidmətinin (DTX) “Realliq.info” saytının rəhbəri İkram Rafiqoğlu ilə bağlı seçdiyi saxlama qərarı reket jurnalistikaya qarşı mübarizənin tərkib hissəsi olmaqla bərabər, həm də ölkəmizin milli təhlükəsizlik məsələsidir.
Baş redaktorun sözlərinə görə, ölkəmizdə media fəaliyyətinə başlamaq qədər asan ilkin şərtlərə malik ikinci bir sahənin olmadığı bəllidir: “Çox asanlıqla sayt və portallar, qəzet və jurnallar açıb fəaliyyət göstərmək mümkün olduğu halda bəziləri asan şəraitin verdiyi imkanlardan sui- istifadə edərək insanların şəxsi həyatına müdaxilə edir, onları alçaldır, şantajla pul qazanır, aylıq haqqa oturdur, hətta jurnalist çətiri altında konstitusiya quruluşunu və dövlətin ərazi bütövlüyünü hədəfə alan çağırışlar edirlər”.
A.Quliyev qeyd edib ki, aradan maliyyələşdiyi bilinmədiyi halda bir şəxsin eyni vaxtda bir neçə sayt yaradaraq fəaliyyət göstərməsi, anormal olmaqla bərabər həm də özündə böyük təhlükələr gəzdirən şübhəli mahiyyətə malikdir: “Jurnalist adı altında hər cür qanuna zidd və jurnalistika ilə əlaqəsi olmayan işlərlə məşğul olmaq, bu işlərə görə cəzalandırılanda isə "jurnalist təqib olunur" kimi hay-küylə dünyanın diqqətini cəlb etmək cəhdləri dövlətə zərbə vurmaq niyyətindən başqa bir şey deyil. Azərbaycan dövləti və şəxsən Prezident İlham Əliyev əsl jurnalistikaya və peşəkar jurnalistlərə hər cür himayə göstərir. Buna qane olmayaraq özləri üçün başqa imkanlar axtaranlar, reketçilik üsullarına meyllənərək həm medianı, həm də ictimai mənafeləri gözdən salırlar”.
Baş redaktor vurğulayıb ki, İkram Rafiqoğlu ilə bağlı saxlanma qərarı bir daha göstərdi ki, reket üsullarla əsl jurnalistika bir araya sığmaz və jurnalist adı altında qanuna zidd əməllərlə məşğulluq halları hər zaman ciddi nəzarətdə saxlanmalıdır: “Reketçiliklə məşğul olan qondarma jurnalistlər və bu sayaq media orqanları ilə mübarizə ictimai qınaq, hüquqi müstəvidə bir-birini tamamlayan zəruri mübarizələr kimi davam etdirilməlidir”.
