"Müdafiə Nazirliyi ilə dəqiqləşdirmədən belə məlumatların yayılması qeyri-peşəkarlığın, məsuliyyətsizliyin nümunəsidir"
Xəbər verildiyi kimi, Müdafiə Nazirliyi bəyanat yayıb. Nazirlik Azərbaycan Ordusunun əsgəri Qəmbərov Vüsal Razim oğlunun düşmənin açdığı atəş nəticəsində həlak olması xəbərini təkzib edib: "Bəzi kütləvi informasiya vasitələrində Şəmkir rayonundan hərbi xidmətə çağırılmış əsgər Qəmbərov Vüsal Razim oğlunun düşmənin açdığı atəş nəticəsində həlak olması barədə yayılan xəbərlər həqiqətə uyğun deyil. Hadisə ilə bağlı Hərbi Prokurorluq tərəfindən cinayət işi başlanıb və hazırda araşdırma aparılır. Müdafiə Nazirliyi növbəti dəfə kütləvi informasiya vasitələrinə müraciət edərək bildirir ki, Silahlı Qüvvələrimiz haqqında yoxlanılmamış və rəsmi təsdiq edilməmiş məlumatların verilməsi qəbuledilməzdir".
Qeyd edək ki, 1997-ci il təvəllüdlü Qəmbərov Vüsal Razim oğlunun Naxçıvanın Şahbuz rayonu "N" saylı hərbi hissəsində düşmənin açdığı atəş nəticəsində şəhid olduğu deyilirdi.
Məlumat üçün qeyd edək ki, adıçəkilən əsgər düşmən gülləsindən deyil, qeyri-döyüş şəraitində dünyasını dəyişib. Yuxarıda qeyd olunduğu kimi, bununla bağlı araşdırma aparılır. Bütün hallarda, bəzi media orqanlarının Müdafiə Nazirliyindən əvvəl belə məlumat yayması nə dərəcədə doğrudur?
Məsələyə münasibət bildirən "Xalq Cəbhəsi" qəzetinin baş redaktoru Elçin Mirzəbəylinin sözlərinə görə, bu qeyri-peşəkarlığın göstəricisidir: "Əslində bütün mətbuat orqanlarının və KİV adına iddia edən bütün qurumların belə səhvlərə yol verməməsi üçün kifayət qədər təcrübə formalaşdırılır. Bir il bundan əvvəl, avqust ayında akademik Ramiz Mehdiyevin iştirakı ilə keçirilən müzakirələrdə bütün bu məsələlər ətraflı və geniş təhlil olundu. Mətbuatın yaranmış vəziyyətdən çıxış yolları da konkret istiqamətlərlə göstərildi. Ancaq təəssüflər olsun ki, bir sıra mətbuat orqanları yenə də bundan nəticə çıxarmadılar. Aprel döyüşləri ilə də bağlı bəzi yanlışlıqlar oldu, lakin bu əvvəlki qədər kütləvi şəkildə deyildi. Ancaq bütün baş verən hadisələrdən sonra yenidən Müdafiə Nazirliyi ilə dəqiqləşdirmədən belə məlumatların yayılması qeyri-peşəkarlığın, məsuliyyətsizliyin nümunəsidir. Bu bir daha sübuta yetirir ki, internet media sahəsində qanuni tənzimləmələr sərtləşdirilməli və belə problemlərin aradan qaldırılması üçün daha çevik mexanizmlər yaradılmalıdır".
Vidadi ORDAHALLI
