Bu gün Mərkəzi Seçki Komissiyasının növbəti iclası keçirilib. Trend-in məlumatına görə, iclasda MSK-nın 27 avqust 2016-cı il tarixli iclas protokolu müzakirə edilib. Protokol yekdilliklə qəbul edilib.
İclasda ölkə hüdudlarından kənarda səs verən seçicilərin seçici siyahılarına alınması məqsədi ilə müvafiq seçki dairələrinin müəyyən edilməsi müzakirə edilib. Qərar qəbul edilib.
MSK sədri Məzahir Pənahov qeyd edib ki, referendumun keçirilməsi ilə bağlı MSK tərəfindən tədbirlər davam edir. Artıq MSK tərəfindən ölkədə 161 müşahidəçi qeydiyyata alınıb. Onlardan 6-sı MDB Parlament Assambleyası Şurasının katibliyini təmsil edir.
İndiyə qədər dairə Seçki Komissiyasında müşahidə aparmaq üçün 7503 nəfər qeydiyyata alınıb.
MSK sədrinin sözlərinə görə, müşahidə aparmaq hüququ olan heç bir müşahidəçi üçün problem yaradılmamalıdır: "Sabahdan Seçki Dairələri üzrə MSk-nın təlimlərinə başlanacaq. Sonuncu tədrbirimiz Penitensiar Xidmətlə birgə olacaq".
M.Pənahov bildirib ki, təşviqat qrupları ilə əlaqələri gücləndirmək lazımdır. Onun sözlərinə görə, səsverməyə 15-20 gün qalmış bülletenlərin paylanması başa çatmalıdır.
