"Adətən xarici iş adamları bu amillərə xüsusi önəm verir"
Nazirlər Kabineti tərəfindən "Əcnəbilərin və vətəndaşlığı olmayan şəxslərin Azərbaycan ərazisində müvəqqəti olma müddətinin uzadılması, müvəqqəti və ya daimi yaşamaq üçün icazənin, o cümlədən iş icazəsinin verilməsi (və ya müddətinin uzadılması) üçün ərizə-anket nümunələrinin təsdiq edilməsi barədə" Qərara dəyişiklik edilib.
Nazirlər Kabinetindən verilən məlumata görə, əcnəbilərə və vətəndaşlığı olmayan şəxslərə Azərbaycan ərazisində müvəqqəti yaşamaq icazəsinin verilməsi (müddətinin uzadılması) üçün ərizə-anketə aşağıdakı məzmunda bəndlər əlavə edilib:
- Azərbaycan Prezidentinin müəyyən etdiyi fəaliyyət sahələri üzrə işlərin görülməsi və ya xidmətlərin göstərilməsi üçün ölkə vətəndaşları və ya Azərbaycanda təsis edilmiş hüquqi şəxslər tərəfindən dəvət edilmiş, Azərbaycan Prezidentinin müəyyən etdiyi kateqoriyaya aid mütəxəssis olduqda;
- Azərbaycanda təsis edilmiş və təsisçisi və ya təsisçilərdən ən azı biri xarici hüquqi və ya fiziki şəxs olan hüquqi şəxsin rəhbəri və onun müavini vəzifəsini tutduqda.
Bu yenilik özündə nəyi ehtiva edir?
Miqrasiya məsələləri üzrə ekspert Elbrus Mirzəli qəzetimizə açıqlamasında bildirdi ki, əslində buna qanunvericiliyə hansısa köklü dəyişikliyin edilməsi kimi baxa bilmərik: "Azərbaycanın miqrasiya qanunvericiliyi kifayət qədər təkmil sayılır. Bunu yalnız biz yox, bu sahənin tanınmış ekspertləri də deyir. Bu yaxınlarda ölkəmizdə miqrasiya problemlərini əhatə edən böyük bir konfrans keçirildi. Həmin tədbirdə də bizdə olan vəziyyət təqdir olunub. Bilirsiniz ki, ölkə başçısı dəfələrlə bu məsələlərə toxunaraq bildirib ki, ölkəyə gələn turistlər və biznes qurmaq istəyən əcnəbilərlə bağlı hər hansı bir problem yaşanmamalıdır. Bu baxımdan da qanunvericilikdə olan bəzi maneələr aradan qaldırılır. Biz bunu vizaların sadələşdirilməsi və bir sıra digər istiqamətlərdə müşahidə etmişik. Əcnəbi və vətəndaşlığı olmayanların ölkəmizdə qalması qaydaları da kifayət qədər təkmildir. Sadəcə, burada fəaliyyət göstərən əcnəbi iş adamları üçün bu proses bir qədər də sadələşdirilir. Əsasən də müştərək biznes layihələrdə iştirakçı olan əcnəbilər ölkəmizdə daha uyğun şərtlərlə yaşaya biləcək. Bu yeniliyin eyni zamanda ölkəmizə xarici sərmayənin cəlbinə də müsbət təsiri olacaq. Adətən xarici iş adamları bu amillərə xüsusi önəm verir".
Məhəmmədəli QƏRİBLİ
